Дзяржаўны тэлеканал АНТ зрабіў падборку відэа з падтрымкай Аляксандра Лукашэнкі, якія зьявіліся ў сацыяльных сетках пад хэштэгам #ямыбатька. Хэштэг стаў адказам на ранейшы флэшмоб праціўнікаў Лукашэнкі «Я/мы97%». Вось некаторыя выказваньні прыхільнікаў цяперашняй улады:
- «Бярэм Эўропу – наркаманія, прастытуцыя, гандаль людзьмі, тэракты. Расея – тое ж самае. У нас? Я ня ведаю. У навінах нічога, акрамя п’янай бойкі, сусед з суседам зладзіў панажоўшчыну. Усё. Гэта будавалася 26 гадоў. Страціць гэта – бязглузда. Думайце галавой».
- «Дапусьцім, што вас 97 адсоткаў. Што вы зрабілі, каб не пакутаваць? Што менавіта вас не задавальняе, чаго вам не хапае? Ведаеце, чаму вам здаецца, што нас 3 адсоткі? Большасьць з тых, хто за цяперашнюю ўладу, проста займаецца сабой».
- «У гісторыі шмат прыкладаў, калі неадукаваныя, ды і проста псыхічна няўстойлівыя людзі вырашалі лёс дзяржаваў, заліваючы іх патокамі людзкой крыві. Рэвалюцыянэры заўсёды аднолькавыя – абы не працаваць, а вырваць сабе тлусты кавалак за кошт іншых. Не дапусьцім гэтага».
