15 ліпеня адвакаты Віктара Бабарыкі Натальля Мацкевіч і Дзьмітры Лаеўскі наведалі яго ў СІЗА КДБ. Як абаронцы расказалі Tut.by, Віктар Бабарыка ўжо ведае пра ўчорашняе рашэньне ЦВК, ня згодны зь ім і будзе абскарджваць усімі прадугледжанымі ў законе спосабамі.
«Віктар Дзьмітрыевіч настойвае на тым, што інфармацыя ў ягонай дэклярацыі дакладная, а іншыя агучаныя акалічнасьці не даказаныя. Ён сёньня накіруе ў ЦВК заяву аб азнаямленьні яго з дакумэнтамі, якія сталі падставай для прыняцьця рашэньня аб адмове ў рэгістрацыі, бо гэтых зьвестак яму не прад’яўлялі раней. І гатовы выкласьці сваю пазыцыю суду, які будзе разглядаць скаргу на рашэньне ЦВК», — сказалі адвакаты.
Сам Віктар Бабарыка, паводле абаронцаў, трымаецца мужна, настроены змагацца — як ён падкрэсьліў, незалежна ад таго, колькі часу гэта запатрабуе, перш за ўсё таму, што высока цэніць падтрымку, аказаную яму людзьмі.
«І, вядома, таму, што ня згодны з выстаўленым абвінавачаньнем, якое бок абароны даўно абскардзіў генэральнаму пракурору», — падкрэсьліваюць адвакаты.
14 ліпеня падчас рэгістрацыі кандыдатаў у прэзыдэнты Беларусі двум кандыдатам — Віктару Бабарыку і Валеру Цапкалу — адмовілі ў рэгістрацыі. Ярмошына прапанавала адмовіць Бабарыку ў рэгістрацыі ў сувязі зь неадпаведнасьцю дэклярацыі фактычным даходам, а таксама на падставе ўдзелу замежнай арганізацыі ў ягонай кампаніі. За тое, каб адмовіць Бабарыку ў рэгістрацыі, прагаласавалі аднагалосна.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
