На сайце petitions.by зьявілася ўжо другая за апошнія суткі пэтыцыя за вызваленьне патэнцыйнага кандыдата ў прэзыдэнты Віктара Бабарыкі.
У адрозьненьне ад першай пэтыцыі на change.org (яе органы, да якіх зьвяртаюцца падпісанты, могуць праігнараваць), з petitions.by робіцца афіцыйны зварот, адказ на які абавязаныя даць цягам 15 сутак. Пэтыцыю плянуюць накіраваць у адміністрацыю Лукашэнкі і Камітэт дзяржаўнага кантролю Беларусі.
У ёй патрабуюць вызваліць Віктара Бабарыку і спыніць перасьлед у дачыненьні да яго, ягонай сям’і, сяброў, былых калегаў, удзельнікаў ініцыятыўных груп, зборшчыкаў подпісаў і «любых грамадзян, якія падтрымліваюць яго ў ролі кандыдата на пасаду прэзыдэнта Рэспублікі Беларусь».
Затрыманьне Бабарыкі аўтары пэтыцыі называюць «грубым парушэньнем чалавечых правоў» як у адносінах да самога Віктара Бабарыкі, так і да ўсіх грамадзян Беларусі, якія хочуць аддаць свой голас за яго на прэзыдэнцкіх выбарах 2020 году.
«Патрабуем забясьпечыць законнасьць і роўныя магчымасьці для правядзеньня выбарчай кампаніі ўсіх прэтэндэнтаў на пасаду прэзыдэнта Беларусі», — гаворыцца ў пэтыцыі.
У ёй таксама адзначаюць, што з 18 чэрвеня дзяржаўныя СМІ трансьлююць навіны аб затрыманьні Бабарыкі, якія «парушаюць прэзумпцыю невінаватасьці», бо ў адпаведнасьці з Канстытуцыяй ніхто ня можа быць прызнаны вінаватым у злачынстве, пакуль яго віна не даказаная і не прызнаная судовым прысудам. Таксама ў пэтыцыі гаворыцца пра незаконнае ўмяшаньне ў асабістае жыцьцё Бабарыкі, «замах на недатыкальнасьць яго жытла або таямніцу ягонай карэспандэнцыі, на ягоны гонар і рэпутацыю».
Аўтары пэтыцыі дадаюць, што да Віктара Бабарыкі і ягонага сына Эдуарда не пускаюць адвакатаў, што парушае іх канстытуцыйныя правы (адвакатаў да Бабарыкі на другі дзень пасьля затрыманьня ўсё ж пусьцілі. — РС).
На момант публікацыі пэтыцыя сабрала больш за 3200 подпісаў.
Першая пэтыцыя на change.org сабрала ўжо 151,6 тысячы подпісаў. Але адказваць на яе чыноўнікі не абавязаныя.
