Вярхоўная Рада Ўкраіны пагадзілася з прапановай прэзыдэнта Ўладзіміра Зяленскага прызначыць на пасаду генэральнага пракурора Ірыну Венядзіктаву.
Упершыню за гісторыю незалежнасьці краіны Генэральную пракуратуру ачоліла жанчына.
«Улічваючы сытуацыю ў нашай краіне, неабходнасьць забесьпячэньня высокапрафэсійнай і бесьперабойнай працы ўсіх органаў дзяржаўнай улады, асабліва праваахоўных органаў, я ініцыяваў разгляд пытаньня аб прызначэньні генэральнага пракурора на нечарговым пасяджэньні парлямэнту», — заявіў Уладзімір Зяленскі, прадстаўляючы кандыдатуру Ірыны Венядзіктавай у парлямэнце.
Ірына Венядзіктава запэўніла, што на пасадзе будзе кіравацца прынцыпам вяршэнства закону. Яна перакананая, што цяпер ва Ўкраіне няма палітычнага перасьледу.
На парлямэнцкіх выбарах 2019 году Ірына Венядзіктава балятавалася пад № 3 партыйнага сьпісу партыі Ўладзіміра Зяленскага «Слуга народу». Але летась у сьнежні здала дэпутацкі мандат у сувязі з прызначэньнем выканаўцай абавязкаў кіраўніка Дзяржаўнага бюро расьсьледаваньняў. Там яна прызначыла сваім першым намесьнікам Аляксандра Бабікава, які працаваў адвакатам Віктара Януковіча.
Ірына Венядзіктава — вядомы ўкраінскі юрыст. Да прыходу ў палітыку яна працавала ў Харкаўскім нацыянальным унівэрсытэце. Доктар юрыдычных навук, прафэсар. Ёй 42 гады.
