Крытыка прагучала на пасяджэньні Рады Бясьпекі ААН.
ЗША, Брытанія і Эстонія абвінавацілі расейскую вайсковую выведку (ГРУ) у масавых кібэратаках супраць грузінскіх урадавых сайтаў і мэдыя з мэтай «пасеяць разлад і парушыць жыцьцё звычайных грузінаў».
Тры краіны 5 сакавіка заявілі ў Радзе Бясьпекі ААН, што кібэратакі «зьяўляюцца часткай шматгадовай расейскай кампаніі варожай і дэстабілізацыйнай дзейнасьці супраць Грузіі і часткай больш шырокай схемы злачыннай дзейнасьці».
Заўвагі прагучалі пасьля таго, як амбасадар Грузіі напісаў у лютым у Раду Бясьпекі ААН пра маштабную атаку ў кастрычніку.
20 лютага ЗША і Вялікая Брытанія публічна далучыліся да Грузіі, абвінаваціўшы Расею ў зладжанай кібэратацы, якая блякавала тысячы грузінскіх сайтаў і сарвала тэлевізійныя трансьляцыі.
28 кастрычніка былі збоі больш як 2000 дзяржаўных, прыватных і мэдыясайтаў, а таксама дзьвюх прыватных тэлевізійных станцый — Imedi і Maestro. У лік сайтаў-цэляў уваходзілі офіс прэзыдэнта і мясцовыя муніцыпальныя упраўленьні.
У той час у Вашынгтоне і Лёндане ў асобных заявах адзначалася, што тэракты былі ўчыненыя вайсковым выведніцкім агенцтвам ГРУ Расеі, вядомым як падразьдзяленьне 74455 і Sandworm.
Sandworm вядомы як асобная група хакераў у ГРУ, і экспэрты ў бясьпецы зьвязваюць яе з такімі кібэр-парушэньнямі, як крадзеж 9 гігабайтаў электронных лістоў падчас прэзыдэнцкай кампаніі Францыі Эмануэля Макрона, аналягічнай кампаніі супраць Дэмакратычнага нацыянальнага камітэту ў ЗША ў 2016 годзе, а таксама шкоднае праграмнае забесьпячэньне, якое пашкодзіла энэргасыстэме Ўкраіны ў 2015 годзе і распаўсюдзілася па ўсім сьвеце.
У ААН 5 сакавіка пасол Эстоніі Свэн Юргенсан прачытаў заяву, стоячы з брытанскай пасланьніцай Карэн Пірс і выканаўцай абавязкаў намесьніка амбасадара ЗША Чэрыт Норман Шале, заявіўшы, што напады дэманструюць «працяг схемы неабдуманых... кібэратак супраць шэрагу краін» ГРУ.
«Гэтыя дзеяньні відавочна супярэчаць спробам Расеі сьцьвярджаць, што яна зьяўляецца адзіным адказным гульцом у кібэрпрасторы», — гаворыцца ў іх заяве. «Безадказнасьць у кібэрпрасторы шкодзіць усім нам».
Міністэрства замежных спраў Расеі адхіліла абвінавачаньні як «неабгрунтаваныя і палітычна абумоўленыя».
Яно сказала, што абвінавачаньні адлюстроўваюць намаганьні Грузіі ў «дэманізацыі» Расеі і што яны будуць пагаршаць адносіны паміж краінамі.
Расея мае складаныя стасункі са сваёй паўднёвай суседкай, якая імкнецца далучыцца да заходніх арганізацый, у тым ліку да Эўрапейскага зьвязу і NATO, скіраваных супраць Масквы.
Расея вяла пяцідзённую вайну з Грузіяй у 2008 годзе, пасьля чаго Расея прызнала прэтэнзіі на незалежнасьць двух самаабвешчаных рэгіёнаў, Абхазіі і Паўднёвай Асэтыі, якія складаюць 20 % яе тэрыторыі. Расея — адна з нешматлікіх краін, якая прызнае незалежнасьць гэтых рэгіёнаў.
