Бюро дэмакратычных інстытутаў і правоў чалавека Арганізацыі бясьпекі і супрацоўніцтва ў Эўропе (БДІПЧ АБСЭ) апублікавала фінальную справаздачу па выніках назіраньня за парлямэнцкімі выбарамі ў Беларусі ў лістападзе 2019 году.
У выніковай частцы справаздачы на сайце АБСЭ, на якую спасылаецца БелаПАН, гаворыцца, што Выбарчы кодэкс Беларусі «зьмяшчае шматлікія прабелы і супярэчнасьці».
«Папраўкамі да законаў аб масавых мерапрыемствах і сродках масавых інфармацыі ўведзеныя новыя палажэньні аб публічных сходах і сеткавых СМІ, але пакінута без увагі абарона асноўных свабодаў. У некаторых выпадках неадназначныя прававыя палажэньні прымяняюцца для таго, каб абмежаваць удзел кандыдатаў ад апазыцыі».
У дакумэнце таксама адзначаецца, што ў цэлым прававыя рамкі не гарантуюць правядзеньня выбараў у адпаведнасьці з патрабаваньнямі АБСЭ і іншымі міжнароднымі стандартамі. Шэраг ключавых рэкамэндацый БДІПЧ і Вэнэцыянскай камісіі Рады Эўропы застаюцца нявыкананымі, у тым ліку:
- незбалянсаванасьць складу выбарчых камісій
- абмежаваньні правоў выбарнікаў і кандыдатаў
- недастатковасьць захадаў засьцярогі пры галасаваньні і падліку галасоў
- мінімізацыя ролі назіральнікаў.
Агулам у дакумэнце зьмяшчаюцца 32 рэкамендацыі для ўдасканаленьня выбарчага працэсу ў краіне. Іх выкананьне, як лічаць аўтары справаздачы, дапаможа прывесьці працэдуру дэмакратычных выбараў у поўную адпаведнасьць з патрабаваньнямі АБСЭ і іншымі міжнароднымі абавязаньнямі і стандартамі.
Выбары дэпутатаў Палаты прадстаўнікоў Нацыянальнага сходу Беларусі сёмага скліканьня прайшлі летась 17 лістапада. Пасьля асноўнага дня галасаваньня кіраўніца кароткатэрміновай місіі назіральнікаў ад АБСЭ Маргарэт Сэдэрфэльт заявіла, што палітычная кампанія хоць і прайшла ў спакойнай абстаноўцы, аднак не адпавядала стандартам правядзеньня выбараў.
