У Бухарэсьце 30 лістапада прайшло лёсаваньне групавога этапу чэмпіянату Эўропы ў футболе сярод мужчынаў у 2020 годзе. Зборная Беларусі можа трапіць у групу C або F, але давядзецца перамагчы Грузію, а затым Косава або Паўночную Македонію.
- Беларусь ідзе па «шляху D» з футбольнай Лігі нацыяў: спачатку згуляе з Грузіяй, а калі пераможа, то згуляе зь пераможцам матчу Косава – Паўночная Македонія.
- Расея трапіла ў групу B з Бэльгіяй, Даніяй і Фінляндыяй.
- Украіна ў групе C зь Нідэрляндамі, Аўстрыяй і пераможцам стыкавых матчаў «шляху А» (Ісьляндыя, Баўгарыя, Вугоршчына, Румынія) або «шляху D» (па апошнім ідзе Беларусь).
- Польшча ў групе E, дзе таксама Гішпанія і Швэцыя плюс пераможца стыкавых матчаў «шляху B» (Босьнія і Герцагавіна, Нарвэгія, Сэрбія, Ізраіль).
- У групе F, куды таксама можа трапіць Беларусь, згуляюць Нямеччына, Францыя і Партугалія. Гэткі склад часам называюць «групай сьмерці»: Беларусь можа трапіць да трэцяй, пятай і шостай краіны ў рэйтынгу UEFA.
- Беларусь трапляе ў групу F, калі Румынія перамагае ў «шляху A». У астатніх выпадках — у групу C.
- У рэйтынгу UEFA Беларусь цяпер займае 25-е месца, а Грузія — 44-е (але ў рэйтынгу FIFA каманды даволі блізка: на 87 і 91 месцах). Да таго каманды Беларусі і Грузіі сустракаліся двойчы ў афіцыйных матчах у кваліфікацыі на чэмпіянат сьвету: у 2012 годзе Грузія перамагла 1:0, затым Беларусь перамагла 2:0. У 2017-м Грузія і Беларусь згулялі 2:2 у таварыскім матчы.
