Намесьнік генэральнага пракурора Ўкраіны — галоўны ваенны пракурор Віктар Чумак абяцае аўдыт крымінальных справаў у дачыненьні да Эўрамайдану.
Паводле яго слоў, у сувязі з тым, што з 20 лістапада па законе, пракуратура будзе пазбаўленая паўнамоцтваў праводзіць расьсьледаваньне, справы Майдана перададуць у Дзяржаўнае бюро расьсьледаваньняў, а працэсуальнае кіраўніцтва па гэтых справах будзе ажыцьцяўляць Генэральная пракуратура, дзе ўжо створаны адпаведны дэпартамэнт.
«Мы створым аўдыт гэтых спраў. У гэтую аўдытарскую групу ўвойдуць адвакаты па справах і сваякі загінулых на Майдане. І тады мы ўбачым аб’ектыўную карціну таго, што адбываецца», — сказаў Чумак.
24 кастрычніка былы начальнік упраўленьня спэцыяльных расьсьледаваньняў Генэральнай пракуратуры Сяргей Гарбацюк заявіў, што ў цяперашні час праца па справах аб злачынствах у часе Эўрамайдану «фактычна спыненая».
Паводле зьвестак Генпракуратуры, падчас акцый зімы 2013-2014 гадоў пацярпелі 2,5 тысячы чалавек, 104 зь іх загінулі. Пасьля загінулых удзельнікаў акцый пратэсту сталі называць Нябеснай сотняй.
