ЗША і Вялікая Брытанія занепакоеныя рашэньнем расейскага суду, які асудзіў ўкраінскага палітвязьня Паўла Грыба на 6 гадоў пазбаўленьня волі, і заклікаюць Маскву неадкладна вызваліць ўкраінца. Пра гэта паведамляе «Інтэрфакс».
«Мы глыбока занепакоеныя сёньняшнім выракам суду РФ, паводле якога Павел Грыб несправядліва асуджаны да 6 гадоў зьняволеньня. Мы таксама занепакоеныя адносна цяжкага стану яго здароўя», — сказана ў паведамленьні амэрыканскай амбасады ў Твітэры ў пятніцу.
ЗША заклікаюць Расею «неадкладна вызваліць усіх палітычных зьняволеных, паважаць сувэрэнітэт Украіны і правы яе грамадзян, а таксама спыніць беспадстаўны палітычны перасьлед украінцаў».
Міністар замежных справаў Вялікай Брытаніі Джэрэмі Гант таксама заклікаў Расею неадкладна вызваліць Паўла Грыба.
«Працяг выкарыстаньня Расеяй палітычна матываваных затрыманьняў жахае. Павел Грыб быў сёньня асуджаны да 6 гадоў. Ён пакутуе ад сур’ёзных захворваньняў і не атрымліваў адэкватную мэдычную дапамогу ў расейскім ізалятары. Усьлед за Паўлом Клімкіным я заклікаю неадкладна вызваліць Паўла Грыба», — напісаў Гант ў Твітэры.
Раней сёньня Паўночна-Каўкаскі акруговы вайсковы суд вынес абвінаваўчы прысуд Паўлу Грыбу, асудзіўшы яго да 6 гадоў пазбаўленьня волі ў калёніі агульнага рэжыму. Украінец у апошнім слове сказаў, што не прызнае абвінавачваньні ФСБ Расеі ў садзеяньні тэрарыстычнай дзейнасьці.
19-гадовы Павел Грыб зьнік 24 жніўня 2017 году падчас наведваньня Беларусі. Пазьней стала вядома, што ён знаходзіцца ў сьледчым ізалятары ў Краснадары.
У Расеі Грыба абвінавацілі ў падбухторваньні да тэракту, ён усе абвінавачваньні адмаўляе.
З прычыны пагаршэньня стану здароўя Павел Грыб мае патрэбу ў тэрміновай мэдычнай дапамозе, у тым ліку ў апэрацыі.
