Парлямэнт Кубы зацьвердзіў праект новай канстытуцыі, скіраванай на мадэрнізацыю дзяржавы. Новая канстытуцыя зьмяняе структуру выканаўчай улады, афіцыйна прызнае прыватную ўласнасьць і вольны рынак і адкрывае дзьверы для легалізацыі аднаполых шлюбаў.
Новая канстытуцыя мае на мэце «мадэрнізаваць кубінскую сацыяльна-эканамічную мадэль», не адступаючы ад сацыялістычнай дактрыны. Вырашальная роля кампартыі застаецца нязьменнай, але ў новай рэдакцыі зьнікла «пабудова камунізму» як галоўная мэта.
Асноўныя зьмены:
- прызнаньне прыватнай уласнасьці
- падтрымка замежных інвэстыцыяў
- умацаваньне сыстэмы правасудзьдзя: зьявілася «прэзумпцыя невінаватасьці»
- зноў уводзіцца пасада прэм’ер-міністра
- прэзыдэнцкая функцыя абмяжоўваецца двума 5-гадовымі тэрмінамі
- кандыдат на прэзыдэнта ня можа быць старэйшым за 60 гадоў (у першы тэрмін)
- Дзяржаўнай радай будзе кіраваць не прэзыдэнт, а старшыня парлямэнту
- забараняецца дыскрымінацыя паводле полу, этнаса ці інваліднасьці
- зьнікае ўдакладненьне пра шлюб, як зьвяз паміж мужчынам і жанчынай
Кубінскае кіраўніцтва запэўнівае, што зьмена канстытуцыі не зьяўляецца пераходам да капіталізму. «Сацыялізм недатыкальны, Куба ніколі ня вернецца да капіталізму», — піша камуністычная газэта Granma.
Жыхары Кубы павінны ўхваліць новую канстытуцыю да канца году на рэфэрэндуме.
Аналітыкі адзначаюць, што камуністычнае кіраўніцтва Кубы зараз спрабуе ўзаконіць эканамічныя рэформы апошніх гадоў, якія ўступілі ў супярэчнасьць зь цяперашняй канстытуцыяй, што дзейнічае ад 1976 году.
