Беларускія памежнікі паставілі штамп у пашпарт народнага дэпутата Ўкраіны Ігара Гузя, што ён неўязны ў Рэспубліку Беларусь, і прымусілі пакінуць прапускны пункт. Народны дэпутат вымушаны быў вярнуцца ва Ўкраіну.
Ігар Гузь адказаў на пытаньні карэспандэнта Свабоды.
— На які тэрмін вам забаронены ўезд у Беларусь і па якой прычыне?
— Я прасіў даць мне паперу пра тое, на колькі часу мне забаронены ўезд на тэрыторыю Беларусі. Але яны патлумачылі, што ня маюць права даваць мне такую паперу, — проста ўезд забаронены. Сказалі, каб я зьвяртаўся ў амбасаду Расеі, а не Беларусі, каб даведацца, на які час мне забаронены ўезд.
— Чаму зьвяртацца ў амбасаду Расеі, яны гэта неяк патлумачылі?
— Беларускія памежнікі, там былі таксама супрацоўнікі КДБ, цьвердзілі, што мяне не пускаюць у Беларусь па патрабаваньні Расейскай Фэдэрацыі. Што ёсьць папера, што я непажаданая асоба ў РФ. А адпаведна, я так разумею, з-за міждзяржаўных дамоваў паміж Расеяй і Беларусьсю мяне не пусьцілі ў Беларусь. Ва ўсялякім разе такая інфармацыя гучала ад беларускіх памежнікаў.
— Вам ужо забаранялі ўезд у Беларусь?
— Так, у 2005 годзе я быў дэпартаваны з забаронай уезду на 5 гадоў. Я тады браў удзел у акцыі «Чарнобыльскі шлях» і адседзеў у менскай турме на Акрэсьціна 10 сутак. Мы трымалі галадоўку. Але ўжо гэты тэрмін выйшаў, прайшло 11 гадоў ад таго часу. Ну, вось наступны крок.
— Як вы пракамэнтуеце гэтую сытуацыю і што будзеце рабіць цяпер?
— Выснова адна. Лукашэнка, як і Пуцін, баіцца людзей, якія маюць сваю пазыцыю ва Ўкраіне. Я ня буду хаваць, што маю адносіны да стварэньня ва Ўкраіне атраду «Пагоня» зь беларускіх добраахвотнікаў, якія ваявалі і ваююць на Данбасе за ўкраінскія інтарэсы. Таму Лукашэнка паказвае, што ён баіцца людзей, якія маюць сваю пазыцыю. Я буду дамагацца ў МЗС, каб яны выслалі ноту пратэст у. Бо я фактычна намесьнік кіраўніка камітэту замежных спраў, і я ехаў, выконваючы свае абавязкі як народны дэпутат дзеля наладжваньня сувязяў. Я меў пэўныя пляны ў Менску. І таму такія дзеяньні недапушчальныя. Я лічу, што МЗС і Вярхоўная рада Ўкраіны павінны на гэтую сытуацыю адрэагаваць.
— Вы зьбіраліся браць удзел у «Чарнобыльскім шляху» ў Менску?
— У мяне была заплянавана сустрэча ў амбасадзе з украінскімі дыпляматамі і прадстаўнікамі дыяспары. Я дамаўляўся пра сустрэчу з Паўлам Севярынцам, Зьмітром Дашкевічам, Міколам Статкевічам, Уладзімерам Някляевым, Анатолем Лябедзькам. То бок фактычна зь лідэрамі апазыцыі. Мне было цікава пачуць іхняе бачаньне сытуацыі ва Ўкраіне і ў Беларусі. У нас плянавалася прэс-канфэрэнцыя ў Менску. Відаць, КДБ ведаў пра гэта, таму дзейнічаў такім чынам.
— Як вы ставіцеся да перасьледу ў Беларусі добраахвотнікаў, якія ваявалі на баку Ўкраіны, і ці будзеце вы іх далей абараняць?
— Канечне, мы цяпер робім усё магчымае, каб быў мараторый на экстрадыцыю гэтых хлопцаў, каб у Беларусь яны не вярталіся, бо ўжо ёсьць такія запыты. Ну а далей працэс наданьня грамадзянства тым, хто хоча, або віду на жыхарства ва Ўкраіне. Я буду яшчэ больш шчыльна займацца цяпер гэтымі пытаньнямі, бо вымушаюць абставіны і пазыцыя беларускіх уладаў.
— А ці мусіць Украіна даваць нейкі сымэтрычны адказ Беларусі, калі ў Беларусь не пускаюць украінскіх дэпутатаў?
— Гэтае пытаньне павінна вырашацца на ўзроўні МЗС. Я думаю, што напэўна ёсьць людзі, якія непажаданыя ва Ўкраіне. Я думаю, што адказ павінен быць.
