Актывісты моладзевай грамадзкай арганізацыі «Альтэрнатыва» правялі вулічную акцыю «Будзьма Беларусамі», прымеркаваную да дня Кастрычніцкага перавароту 7 лістапада. Яны раздавалі мінакам бел-чырвона-белыя стужкі і стужкі з нацыянальным арнамэнтам.
Цягам паўгадзіны на вуліцы Няміга ў Менску яны раздалі некалькі сотняў стужак. Паводле актывістаў, мінакі ў большасьці ахвотна бралі стужкі, некаторыя прышпілялі іх да адзеньня.
Лідэр арганізацыі Алег Корбан гэтак пракамэнтаваў Свабодзе мэту акцыі:
«У чарговую гадавіну Кастрычніцкай рэвалюцыі мы нагадалі беларусам, што яны беларусы, каб яны шанавалі сваю нацыянальную годнасьць і гонар, і ня кланяліся камуністычным тыранам».
