Раённы суд у Варонежы прысудзіў да тэрмінаў ад васьмі гадоў пазбаўленьня волі чатырох членаў сям’і, якія прадавалі ў сваім кафэ булачкі з макам, паведамляе Бі-бі-сі.
У прыватнасьці, 58-гадовы Аляксандр Полухин атрымаў восем гадоў і чатыры месяцы калоніі строгага рэжыму, а яго жонка, дачка і сястра жонкі атрымалі па восем з паловай гадоў.
Судзьдзя пагадзілася з вэрсіяй сьледзтва, што члены сям’і наўмысна дадавалі ў булачкі з харчовым макам макавую саломку, а таксама апырсквалі булачкі опіем, пасьля чаго прадавалі іх мясцовым наркаманам.
Пры гэтым суд праігнараваў вынікі незалежных экспэртызаў і довады запрошаных абаронай экспэртаў, якія сьцьвярджалі, што харчовага маку без наркатычных прымешкаў не бывае.
Адзначалася, што штатныя экспэрты паліцыі называлі зьмесьціва булачак сумесьсю харчовага маку з макавай саломкай, у той час як незалежныя экспэрты казалі пра прымешкі, якія ўзьнікалі ненаўмысна.
Справа была ўзбуджаная яшчэ ў 2009 годзе. Наркапаліцыю зацікавіла адкрытае Палухіным сямейнае кафэ «Ачаг», у якім прадаваліся булачкі з макам.
На думку наркапаліцэйскіх, у булачкі наўмысна дадаваліся наркатычныя рэчывы.
