У рамках Трэцяга бізнэс-форуму «Ўсходняга партнэрства» прадстаўнікі ўладаў Беларусі і беларускія прадпрымальнікі праводзяць перамовы з калегамі з Эўразьвязу.
Як паведаміў Свабодзе афіцыйны прадстаўнік Беларусі на форуме, першы намесьнік міністра эканомікі Аляксандар Забароўскі, сёньня ў яго ўжо адбыліся сустрэчы з прадстаўнікамі ўраду Латвіі:
«Сёньня мы вельмі актыўна папрацавалі з нашымі латвійскімі калегамі, сёньня цудоўна прайшла сэкцыя і першая пленарная сэсія форуму, сёньня мы абмяркоўвалі магчымыя варыянты разьвіцьця фінансавага супрацоўніцтва паміж Беларусьсю і Эўрапейскім Зьвязам. Мы таксама паглядзелі кірунак канкрэтных праектаў у галіне транзыту, разьвіцьця транзытных магчымасьцяў, якія існуюць у нас і якія цікавыя для прыбалтыйскіх дзяржаў. І сёньня вельмі важна, што мы пераходзім на супрацоўніцтва, якое зьяўляецца комплексным і ўзаемавыгадным для двух бакоў — для Беларусі, Латвіі і для больш шырокага кола краін, якія ўваходзяць у эўрапейскую палітыку партнэрства. У Беларусі тут вельмі канкрэтныя, ясныя прагматычныя інтарэсы, якія мы абазначаем. Гэтыя інтарэсы накіраваныя на разьвіцьцё інвэстыцыйнага супрацоўніцтва, на каапэрацыю, і яны зьяўляюцца максымальна канкрэтнымі».
Спадар Забароўскі заявіў, што ў адносінах Беларусі і Эўразьвязу назіраецца прагрэс:
«Амаль падвоіўся лік супольных праектаў, павялічыўся аб’ём узаемных інвэстыцыяў у кірунках Беларусь — ЭЗ, ЭЗ — Беларусь. І, нягледзячы на складаную эканамічную абстаноўку ў Эўропе, на рызыкі і доўгатэрміновыя выклікі, мы разам з нашымі эўрапейскімі калегамі шукаем варыянты вырашэньня гэтых пытаньняў. А бізнэс — гэта самы галоўны драйвэр паляпшэньня адносін і канкрэтных вынікаў. І тое, што наша дэлегацыя тут адна з самых шматлікіх сярод усіх краін партнэрства, паказвае, што ёсьць канкрэтныя рэальныя праекты, якія дазваляюць нам, умацоўваючы эканамічныя сувязі, дывэрсыфікаваць і пастаўкі, і інвэстыцыйнае, і фінансавае супрацоўніцтва, такім чынам ствараючы неабходнае асяродзьдзе для пасьпяховасьці і бізнэсу, і дыялёгу на ўзроўні ўрадаў».
На пытаньне журналістаў, ці не перашкаджаюць гэтаму палітычныя праблемы ў адносінах з Эўразьвязам, першы намесьнік міністра эканомікі Беларусі Аляксандар Забароўскі адказаў:
«Пастаноўка пытаньня пра выбар паміж Захадам і Ўсходам, Брусэлем ці Масквою, а таксама рознага роду штампы — непрымальныя. На сёньняшні дзень мы бачым, што, канструктыўна працуючы з Эўрапейскім Зьвязам, мы гатовыя падвышаць эфэктыўнасьць нашых адносін, падвышаць эфэктыўнасьць доўгатэрміновага супрацоўніцтва паміж Беларусьсю і Эўрапейскім Зьвязам. Гэта вельмі важны галоўны трэнд».
Адказваючы на пытаньне наконт разьвіцьця прыватызацыі ў Беларусі, спадар Забароўскі заявіў, што на сёньня няма гаворкі пра маштабную кампанію прыватызацыі ў краіне.
