Спрашчэньне візавага рэжыму паміж Беларусьсю і Эўразьвязам будуць абмяркоўваць за круглым сталом у бізнэс-клюбе «Імагуру» (вул. Фабрыцыюса, 4, Менск), пачатак а 15-й гадзіне. Запрашаюцца прадстаўнікі дыпляматычных місій, турыстычнай індустрыі, экспэрты.
Суд Цэнтральнага раёну Менску пачне разглядаць грамадзянскую справу супраць Генэральнай пракуратуры ў абарону Курапат.
У Літаратурным музэі Петруся Броўкі пройдуць 22-я Гарэцкія чытаньні, прысьвечаныя жыцьцю і творчасьці братоў Максіма і Гаўрылы Гарэцкіх. Пачатак а 10-й.
З Максіма Гарэцкага:
«Кахаць, вучыцца і працаваць дзеля вызваленьня Беларусі.»
Вынікі рэалізацыі праекту «Здароўе людзям у турме», накіраванага, у прыватнасьці, на змаганьне са СНІДам, будуць абмяркоўваць на прэс-канфэрэнцыі ў гатэлі «Плянэта», пачатак аб 11-й.
Міжнародны дзень Арганізацыі Аб’яднаных нацый у падтрымку ахвяр катаваньняў. 26 чэрвеня 1987 ўступіла ў сілу Канвэнцыя супраць катаваньняў і іншых жорсткіх, бесчалавечных ці прыніжаючых годнасьць спосабаў абыходжаньня і пакараньня.
Гэты дзень у гісторыі
1938 — адбыліся выбары ў Вярхоўны Савет Беларускай ССР 1-га скліканьня.
1941 — супрацоўнікі НКВД расстралялі 5 тысячаў палітвязьняў, прыгнаных зь Менскай і іншых турмаў ва ўрочышча Цагельня каля сучаснага Чэрвеня.
1945—Прадстаўнікі 50 дзяржаў-заснавальніц падпісалі Статут Арганізацыі Аб’яднаных Нацый. Сярод іх была і БССР.
1984 — уведзены ў эксплюатацыю ўчастак першай лініі (Маскоўскай) Менскага мэтрапалітэну.
У гэты дзень нарадзіліся
1909 — Антон Адамовіч, беларускі літаратуразнаўца, гісторык, празаік. У 1920-х пісаў пра творчасьць сучасных яму беларускіх літаратараў, у тым ліку манаграфічнае дасьледаваньне пра творчасьць Максіма Гарэцкага. Уваходзіў у літаб’яднаньне «Узвышша» З 1960 жыў у ЗША. Тады ж стаў адным з кіраўнікоў радыёстанцыі «Свабода».
1926 — Мікалай Паўленка, беларускі мовазнаўца.
1934 — беларускі архітэктар Юрый Градаў. Вядомасьць і прызнаньне (Ленінская прэмія 1970 г.) прынесьлі яму мэмарыяльныя комплексы «Хатынь», «Прарыў» (Ушацкі р-н), «Кацюша» (Орша), помнікі Я.Купалу і Я.Коласу ў Менску. Градаў быў таксама кіраўніком праекту генэральнай пляніроўкі і забудовы цэнтра Менску.
Каляндар Бахарэвіча
26 чэрвеня 1974 Менск стаў горадам-героем
