Мінкультуры шукае арыгінал палотнішча сьцяга, каб прызнаць яго каштоўнасьцю
Мінкультуры шукае арыгінал палотнішча сьцяга, каб прызнаць яго каштоўнасьцю
Міністэрства культуры атрымала заключэньне Нацыянальнай акадэміі навук Беларусі наконт прапановы надаць статус гісторыка-культурнай каштоўнасьці бел-чырвона-беламу сьцягу, які ў 1991–1995 гады быў дзяржаўным сымбалем нашай краіны.
Міністэрства культуры пагаджаецца, што бел-чырвона-белы сьцяг варта захоўваць як матэрыяльны рухомы аб’ект і надаць яму статус гісторыка-культурнай каштоўнасьці. Адпаведнае пытаньне ў студзені разгледзіць на сваім пасяджэньні Навукова-мэтадычная рада.
У лісьце, які падпісаў намесьнік міністра культуры Рэспублікі Беларусь Аляксандар Яцко, паведамляецца:
«Палотнішча Дзяржаўнага сьцяга Рэспублікі Беларусь, якое рэальна выкарыстоўвалася ў 1991–1995 гады, павінна існаваць і захоўвацца як матэрыяльны рухомы аб’ект і яму можа быць прапанавана надаць статус гісторыка-культурнай каштоўнасьці, і ў такім выпадку неабходна дадаткова ўдакладніць яго месцазнаходжаньне і стан захаванасьці.
З улікам атрыманага заключэньня, названая прапанова будзе ўключана ў парадак дня чарговага пасяджэньня Беларускай рэспубліканскай навукова-мэтадычнай рады па пытаньнях гісторыка-культурнай спадчыны пры Міністэрстве культуры Рэспублікі Беларусь, якое запланавана на студзень 2014 г.».
Канчатковае рашэньне на аснове вынікаў студзеньскага пасяджэньня Навукова-мэтадычнай рады, згодна з законам «Аб ахове гісторыка-культурнай спадчыны Рэспублікі Беларусь», будзе прымаць Савет міністраў Рэспублікі Беларусь.
Адно з палотнішчаў дзяржаўнага бел-чырвона-белага сьцяга, якое знаходзілася над Рэзыдэнцыяй прэзыдэнта, было разарвана 16 траўня 1995 года колішнім кіраўніком справамі прэзыдэнта Іванам Ціцяцнковым, праз два дні пасьля рэфэрэндуму аб зьмене сымболікі.
