Вайтовіч пра прызначэньне Гусакова: спэцыяліст ня ў тым кірунку

Гэтая пасада заставалася вакантнай, бо папярэдняга кіраўніка Акадэміі навук Анатоля Русецкага прызначылі сябрам Савету рэспублікі.

Раней Уладзімер Гусакоў займаў пасаду намесьніка старшыні прэзыдыюму акадэміі. Гусакоў — вучоны ў галіне аграрнай навукі.

У інтэрвію карэспандэнту Свабоды акадэмік Аляксандар Вайтовіч, які ўзначальваў АН у 1997—2000 гадах, адзначыў, што больш за год акадэмія заставалася без кіраўніка.

«Гэта вельмі дрэнна, і гэта адлюстраваньне таго стаўленьня, якога трымаецца дзейная ўлада да навукі. І гэта вельмі прыкра і дрэнна.

Цяпер што тычыцца Гусакова. Вельмі хочацца, каб кіраўніком акадэміі быў прызначаны адзін з вучоных, які пасьпяхова працуе ў адным з асноўных кірункаў цяперашняй навукі, дзе навука пераходзіць у найноўшыя тэхналёгіі. Я магу канстатаваць, што Гусакоў не адносіцца да такіх фігур, не падыходзіць пад гэты крытэрый. Але што зроблена, тое зроблена.

Я хачу пажадаць Уладзімеру Рыгоравічу посьпехаў у ягонай працы і думаю, што можна неяк зьмікшаваць той недахоп, што ён спэцыяліст ня ў тым кірунку. Гэта ж ад яго не залежыць, ён склаўся ў тым кірунку, які абраў. Але ён можа выправіць свае недахопы, калі будзе абапірацца на думку вучоных розных профіляў, зь імі кансультавацца і прыслухоўвацца да іх».

Карэспандэнт: «А чаму ж улады абралі менавіта Гусакова, а ня тых вучоных, пра якіх вы кажаце?»

Вайтовіч: «А гэта азначае, што ўлада не разумее, што такое навука і якая ў яе адказнасьць перад разьвіцьцём краіны, і наагул — які ўклад яна можа зрабіць у разьвіцьцё краіны. Гэта азначае, што ўлада не разумее гэтых абставін. І ўлада не разумела гэта 10 гадоў таму і нават болей, калі прызначала наагул не вучонага, не прафэсіянала кіраўніком акадэміі. А яна прызначыла непрафэсіянала і лічыла, што гэта будзе вельмі добра, што ён не прафэсіянал. Але аказалася, што нічога добрага. Улада не разумее».

Карэспандэнт: «У афіцыйным выданьні акадэміі Гусакова называюць ураўнаважаным і даволі кампрамісным...»

Вайтовіч: «Чалавечыя якасьці тут жа ні пры чым. Гэта ж зусім іншая справа».

Карэспандэнт: «Вы казалі пра стаўленьне ўладаў да навукі, пра тое, што амаль год Акадэмія навук была без кіраўніцтва...»

Вайтовіч: «Гэта значыць, што ўлада лічыць, што гэта не такая важная сфэра дзейнасьці ў дзяржаве. Яна не надае асаблівай важнасьці навуковай сфэры і разьвіцьцю навукі, разьвіцьцю тэхналёгій у краіне, калі больш за год не магла прызначыць кіраўніка. Для яе гэта здавалася няважным».

З 2004 па 2010 год старшынём прэзыдыюму Нацыянальнай акадэміі навук Беларусі быў Міхаіл Мясьніковіч. Яго зьмяніў Анатоль Русецкі, які заставаўся кіраўніком Акадэміі да кастрычніка 2012 году.