Паводле расейскага міністра фінансаў, на мінулым тыдні ён сустракаўся з прадстаўнікамі ўраду Беларусі, аднак тыя прапанавалі не абмяркоўваць пытаньня пра ўвядзеньне расейскага рубля. З гэтага Кудрын зрабіў выснову, што беларускі бок у найбліжэйшы час ня будзе гэтага пытаньня разглядаць, і таму не пасьпее ў належны тэрмін перайсьці на расейскую валюту.
Перанос тэрмінаў валютнай інтэграцыі, сказаў Аляксей Кудрын, зьвязаны з патрабаваньнямі беларусаў дадатковых кампэнсацыяў. Свае прапановы расейцы ўжо сфармавалі і зьмякчаць іх ня маюць намеру. Так, прадстаўнік расейскага ўраду сказаў, што Беларусі ня варта спадзявацца на дадатковыя датацыі.
У беларускім Нацбанку кажуць, што заява пра адкладаньне пераходу на расейскі рубель — “гэта толькі пазыцыя Кудрына”. Як заявіў у інтэрвію Свабодзе начальнік упраўленьня інфармацыі Нацбанку Анатоль Драздоў, час яшчэ ёсьць, да таго ж з расейскага боку рашэньне пра перанос тэрмінаў валютнай інтэграцыі будзе прымаць увесь урад, а ня толькі міністар фінансаў.
У той жа час Анатоль Драздоў гаворыць, што пераход на адзіную валюту адбудзецца толькі тады, калі будзе падпісаны ўвесь пакет пагадненьняў, скіраваных на стварэньне адзінай эканамічнай прасторы. А паколькі дамовіцца наконт праектаў усіх пагадненьняў пакуль не атрымліваецца, то ня выключана, што валютную інтэграцыю сапраўды могуць перанесьці на 2006 год.
