На сумеснай прэсавай канфэрэнцыі амэрыканскі прэзыдэнт заявіў:
Абама: "Разам нашы краіны паглыблялі супрацоўніцтва ў барацьбе супраць гвалтоўнага экстрэмізму, паколькі тэрарысты пагражаюць абодвум нашым народам, будзь то на Таймс-сквэр ці ў Маскве. І сёньня мы дамовіліся аб пашырэньні нашага супрацоўніцтва ў галіне разьведкі і барацьбы з тэрарызмам.
Сёньня мы дамовіліся шчыльна каардынаваць нашы дыпляматычныя і гуманітарныя намаганьні ў сувязі з трагічнай успышкай гвалту на этнічнай глебе ў Кіргізстане.
Нашы дзьве краіны па-ранейшаму разыходзяцца па шэрагу пытаньняў, такіх як Грузія, і мы шчыра абмеркавалі гэтыя адрозьненьні. Але рухаючыся наперад у галінах, дзе мы згодныя, нам удалося ўмацаваць нашы адносіны, што прыносіць карысьць рэгіянальнай і глябальнай бясьпецы".
Расейскі прэзыдэнт Мядзьведзеў выказаўся наконт сытуацыі ў Кіргізстане:
Мядзьведзеў: Мы спадзяемся, што ў працэсе выбараў будзе ўтвораная паўнавартасная ўлада, здольная вырашаць задачы, якія стаяць перад дзяржавай. Інакш Кіргізстан чакае дэградацыя і магчыма падзел на часткі. Усе мы занепакоеныя тым, што тады да ўлады ў гэтай краіне могуць прыйсьці радыкалы і тады мы будзем вымушаныя вырашаць там тыя ж задачы, якія вырашаюцца ў іншых рэгіёнах, я маю на ўвазе Аўганістан.
Паводле прэзыдэнта Абамы бакі абмеркавалі гарантыі, каб любыя меры па абароне цывільных асобаў у Кіргізстане рабіліся не пад сьцягам нейкай адной краіны, а пад эгідай міжнароднай супольнасьці.
