Кіраўнік незалежнага прафсаюзу «Гродна Азот» Сяргей Антусевіч паведаміў, што такія заявы напісалі чатыры сябры прафсаюзу.
Адзін зь іх, Артур Богуш, сёньня яшчэ раз распавядаў пра тое, як загадчык цэху, у якім ён працуе, прапанаваў яму тры варыянты: напісаць заяву пра выхад з прафсаюзу альбо пра звальненьне, а ў выпадку, калі ён гэтага ня зробіць яму аб’яўляюць вайну з тым, каб ён пагадзіўся на адзін з двух папярэдніх варыянтаў.
Пасьля першай скаргі ў пракуратуру, са словаў Артура Богуша, з начальнікам цэху правялі гутарку супрацоўнікі пракуратуры і нібыта патлумачылі яму ягоныя правы і абавязкі, пасьля чаго размовы пра прафсаюз спыніліся, але пакараньня начальнік не панёс.
Такі вынік не задаволіў сябраў прафсаюзу і яны паскардзіліся паўторна. І вось атрымалі адказ, што пракуратурай праведзена паўторная праверка, апытаныя тыя, на каго аказваўся ціск і сьведкі, якія пры гэтым прысутнічалі, і па выніках праверкі ў іх няма падстаў для ўзбуджэньня крымінальнай справы.
Лідэр прафсаюзу, Сяргей Антусевіч, кажа што іх пазыцыя не супадае зь меркаваньнем пракуратуры, а таму яны маюць намер шукаць новыя захады, каб прыцягнуць да адказнасьці вінаватых.
Сяргей Антусевіч кажа, што з падобнымі запалохваньнямі сябры незалежнага прафсаюзу сутыкаліся і раней. Не зьмянілася сытуацыя і з прыходам на пасаду новага дырэктара з Расеі Ігара Жыліна.
