“Выбараў няма, а выбарчая кампанія – ёсьць”

ВІЦЕБШЧЫНА

Чыноўнікі супраць таго, каб СМІ друкавалі дэклярацыі аб прыбытках

Сёньня грамадзкі актывіст зь Віцебшчыны Мікалай Петрушэнка заявіў “Свабодзе”, што мясцовыя чыноўнікі, якія зарэгістраваныя кандыдатамі, выступаюць супраць таго, каб у друк траплялі зьвесткі з дэклярацыі аб прыбытках. Вось што кажа Мікалай Петрушэнка пра сытуацыю на Воласаўскім выбарчым участку Талачынскага раёну:

“Патрэбна гэта зрабіць праз раённую газэту. Галосна. А мой канкурэнт пярэчыць, крычыць, што не. Маўляў, гэта маё прыватнае жыцьцё, у яго нельга лезьці. Бачыце, ён нават ня ведае, што паводле заканадаўства ўсе кандыдаты ў дэпутаты абавязаныя ня толькі запоўніць фінансавую дэклярацыю, але і зьвесткі яе нельга ўтойваць ад выбаршчыкаў. Аднак камісія аднагалосна прымае рашэньне надрукаваць зьвесткі аб прыбытках на некалькіх абвестках і разьмясьціць іх на стэндах выбарчых участкаў…”

Нагадаю, што Мікалай Петрушэнка і яго жонка Галіна зарэгістраваныя кандыдатамі ў пасялковы, раённы і абласны Саветы.



ГОМЕЛЬШЧЫНА

Франак Вячорка патрабуе адпачынку на агітацыйную кампанію

Мазырская раённая камісія зарэгістравала салдата-апазыцыянэра Франка Вячорку кандыдатам у дэпутаты райсавету па 25-й Станцыйнай акрузе. На тэрыторыі акругі знаходзіцца й вайсковая частка 48694, дзе служыць Франак.

Як апавёў кіраўнік ініцыятыўнай групы палітсалдата Ўладзімер Целяпун з Мазыра, камандаваньне вайсковай часткі з гвалтам і толькі пад аховай прапаршчыка адпусьціла Франка на паседжаньне раённай выбарчай камісіі.

Нейкіх асаблівых прэтэнзіяў да сабраных подпісаў за вылучэньне салдата кандыдатам у дэпутаты Мазырскага райсавету ў камісіі не было, і Франка зарэгістравалі. Не дазволілі толькі сфатаграфаваць гэтую падзею.

Уладзімер Целяпун мяркуе, што весьці агітацыю й перамагаць на выбарах салдату будзе няпроста:

“Калі б былі выбары, то, магчыма, выйграць можна было б. А так, калі выбараў няма, а ёсьць выбарчая кампанія, то гэта складана. Палітжаўнер Франак Вячорка абмежаваны вайсковым статутам і загадамі камандзіраў. Цяжка ў такіх варунках праводзіць паўнавартасную кампанію й выйграць”.

“Гэта тэст для ўладаў на выкананьне імі законаў”

Спадар Вячорка нядаўна толькі вярнуўся на службу ў Мазыр зь Менску, дзе ў вайсковым мэдычным цэнтры праходзіў дасьледаваньне. Канчатковага мэдычнага заключэньня пра непрыдатнасьць салдата-апазыцыянэра да службы пакуль няма. Каб весьці сапраўдную агітацыйную кампанію, салдату патрэбны адпачынак. Пра гэта кажа й бацька Франка, вядомы беларускі палітык Вінцук Вячорка:

“Паводле заканадаўства ён мае права на месячны адпачынак. І гэта будзе тэст для ўладаў на выкананьне імі законаў. Па-другое, калі яго не адпусьцяць, тады ён кожны дзень будзе бамбіць камандаваньне рапартамі з патрабаваньнем даць яму наведаць, скажам, выбарчую камісію, выбарцаў, зладзіць пікет, узяць сродкі на выраб улётак, вырабіць гэтыя ўлёткі й г. д.

Калі яны будуць абмяжоўваць яго ў гэтых правах — ну што ж, атрымаем яшчэ адзін адпаведны радок у нацыянальных і міжнародных экспэртызах пра дэмакратычнасьць выбарчага працэсу”.



МАГІЛЁЎШЧЫНА

“За 50 тысяч рублёў бігборд ня створыш”

На Магілёўшчыне агітацыйная кампанія бальшыні апазыцыйных кандыдатаў у дэпутаты пачнецца толькі на наступным тыдні.

У Магілёве сямёра кандыдатаў у дэпутаты ад незарэгістраванай Партыі свабоды й прагрэсу да агітацыйнай кампаніі падрыхтаваныя, заяўляе кіраўнік выбарчага штабу Юры Стукалаў.

“Ад дзьвярэй да дзьвярэй — гэта асноўны мэтад нашай кампаніі. На пяцьдзясят тысяч я бігборд у цэнтры гораду з тым, што хачу, не павешу.


Мітынгі ў цэнтры нельга праводзіць. Надрукаваць неабходную колькасьць улётак будзе вялікая праблема ўва ўсіх. На гэтыя грошы ўлётак можна надрукаваць толькі прыкладна каля дзьвюх тысяч”, — прызнае Юры Стукалаў.




Кандыдат скардзіцца на адсутнасьць інфармацыі пра выбары

Кандыдат у дэпутаты аблсавету, актывіст незарэгістраванай партыі “Беларуская хрысьціянская дэмакратыя” з Бабруйску Вячаслаў Шэлег зьбірацца схіляць выбарцаў на свой бок, ходзячы гэтаксама ад выбарца да выбарца. Найбольш яго непакоіць адсутнасьць інфармацыі пра выбары:

“У Бабруйску я бачу толькі тры ўлёткі пра тое, што выбары праходзяць. Працэнтаў семдзесят выбарцаў пра выбары наагул нічога ня ведаюць. Калі ты надрукуеш паўтары тысячы ўлётак гэтых — а выбарцаў патэнцыйных каля пяці тысяч, нават болей”.

Як кажа спадар Шэлег, камісіі ня ведаюць, калі будуць гатовыя аплаціць друкаваньне агітацыйных матэрыялаў.

Як даехаць кандыдату ў аддаленую вёску?

Кандыдатка ў дэпутаты аблсавету, вылучэнка Беларускай партыі левых “Справядлівы сьвет” Зінаіда Мілешчанка спадзяецца, што ёй дапаможа ў агітацыі яе вядомасьць. Яна ўжо была дэпутаткай Круглянскага райсавету. Даць рады асноўнай праблеме, спадзяецца актывістка, зможа кіраўніцтва партыі:

“Раён у нас вялікі, а ў мяне няма свайго транспарту. Я хацела б, каб мне выдзелілі транспарт, каб я магла аб’ехаць хаця б цэнтральныя вёскі і павывешваць свае плякаты. Наўрад ці мне тут у раёне дадуць такі транспарт”.

ГАРАДЗЕНШЧЫНА

На кандыдатаў ціснуць праз сваякоў

Ідэоляг прадпрыемства “Мастоўдрэў” дабіваецца ад супрацоўніцы, каб ейная дачка зьняла сваю кандыдатуру на выбарах.

Спадарыня Наталя ў выбарах удзельнічае ўпершыню, прычым балятуецца не ад дзяржаўнай структуры, а ад дэмакратычнай моладзевай ініцыятывы “Новае пакаленьне”.

Зараз яна ў дэкрэтным адпачынку, а да гэтага працавала на прадпрыемстве “Мастоўдрэў”. Дагэтуль там працуе яе маці, і вось ужо некалькі дзён запар ідэоляг прадпрыемства выклікае маці і дамагаецца, каб дачка зьняла сваю кандыдатуру.

Кажа спадарыня Наталя:

“На працы яе выклікаюць у кабінэт і пачынаюць гаварыць: навошта ваша дачка балятуецца ад БНФ, яна сапсуе сабе рэпутацыю і г.д. Прычым выклікалі некалькі разоў, і ўчора мама выходзіць адтуль са сьлязьмі”.

Спадарыня Наталя наагул дзівіцца паводзінам мясцовага ідэоляга, бо жыве асобна ад маці і мае сваю сям’ю.

Зьміцер Кухлей, які таксама вылучаецца ад “Новага пакаленьня”, кажа: на спадарыню Наталю пачалі ціснуць таму, што яна балятуецца першы раз.

Кухлей: “Проста на астатніх націснуць немагчыма, бо людзі ўжо дасьведчаныя. А яна ў нас чалавек новы, вось яны даведаліся — і думаюць, што на яе можна націснуць і яна адыдзе”.

Зьміцер Кухлей кажа, што ад іхнай ініцыятывы з 8 прэтэндэнтаў зарэгістравалі 6 кандыдатаў — 4 у раённы Савет і 2 ў сельскі.

Нагадаю, што ў Сьвіслачы і Бераставіцы зарэгістравалі па адным кандыдаце ад БСДГ у раённы і абласны саветы.

У Астраўцы з чатырох сябраў АГП ніводнага не зарэгістравалі кандыдатам у раённы савет. Прычына, маўляў, у тым, што знойдзены недакладнасьці ў подпісах выбаршчыкаў.

Аднак астравецкіх актывістаў АГП Івана Крука і Мікалая Уласевіча зарэгістравалі кандыдатамі ў абласны савет.

У Слоніме з 13 апазыцыйных прэтэндэнтаў кандыдатамі ў раённы савет сталі толькі 6. Адмовілі 4 сябрам БНФ, 2 з БХД і аднаму з партыі “Справядлівы сьвет”.