СЛУХАЦЬ:
Аляксандар Сурыкаў усяляк імкнуўся згладзіць вастрыню апошніх супярэчнасьцяў паміж Масквой і Менскам, казаў пра магчымасьць іх вырашэньня, шукаў пазытыўныя аспэкты ў дачыненьнях. Адказваючы на пытаньне пра так званую малочную вайну, выкліканую забаронай Расеі на імпарт большасьці беларускіх малочных прадуктаў, спадар Сурыкаў зазначыў, што за першы квартал гэтага году беларускіх малочных тавараў у Расею было пастаўлена на 37 працэнтаў больш, чым летась. Ён, аднак, прызнаў, што ёсьць некаторыя пытаньні, зьвязаныя з тым, што летась у Расеі ўступіў у сілу новы тэхнічны рэглямэнт, зьвязаны з прыняцьцем закону аб малочнай прадукцыі, падзеленай на натуральную малочную прадукцыю і ўзноўленую — з сухога малака:
Галоўнае. каб там не патруціліся людзі ...
“Гэтыя калізіі цяпер пераадольваюць наглядныя органы Беларусі і Расеі і ў першую чаргу прадпрыемствы, якія пастаўляюць на рынкі Расеі альбо Беларусі малочную прадукцыю. Вось і ўсё пытаньне. Калізійны пэрыяд, безумоўна, скончыцца. Галоўнае тут — абарона інтарэсаў спажыўцоў, каб там не патруціліся людзі і спажывалі больш якасную малочную прадукцыю”.
Спадар Сурыкаў пры гэтым прызнаў, што ён сам спажывае беларускую малочную прадукцыю.
“Усё ідзе сваім парадкам. Але прэсе заўсёды цікава мусіраваць “смажаныя” фактурныя матэрыялы, і я ледзьве не захлынуўся ў гэтым малацэ папяровым...”
Пытаньне выдзяленьня Беларусі апошняй траншы крэдыту ў 500 мільёнаў даляраў, якое выклікала сварку паміж А.Кудрыным і А. Лукашэнкам, таксама вырашаецца, зазначыў спадар Сурыкаў:
“Расея ж не адмовіла ў іх выдзяленьні. Але, улічваючы крызісную сытуацыю, проста міністар фінансаў Расеі зазначыў: давайце мы яшчэ месяц палічым магчымасьці разьліку. Такім чынам, гэтае пытаньне не закрытае”.
Спадар Сурыкаў ня выключыў, што гэтыя грошы могуць быць выдзеленыя Беларусі з антыкрызіснага фонту ЭўрАзЭС, куды Беларусь яшчэ ня ўнесла сваіх складак.
Праблему бар’ераў для паставак у Расею беларускай тэхнікі спадар Сурыкаў патлумачыў аб’ектыўнымі прычынамі:
“Калі скукожыўся пакупніцкі попыт на рынку Расейскай Фэдэрацыі, ніякімі намаганьнямі ўраду яго тэрмінова ня выправіш. Вядома, я разумею крыўды МАЗа, які ня можа тую ж колькасьць машын рэалізаваць, як летась. Але вытворчасьць на расейскім КАМАЗе ўпала ў першым квартале на 80 працэнтаў!”
На пытаньне пра стаўленьне да новага, заходняга ўхілу беларускай зьнешняй палітыкі спадар Сурыкаў адказаў:
мы атрымліваем яшчэ адзін голас на дадатак да расейскага ў эўрапейскіх структурах ...
“Расея дапамагала Беларусі пачаць дыялёг з Эўропай. І я гэтаму сьведка і нават удзельнік. Мы лічым, што гэта правільна — краіна ня можа быць у ізаляцыі. Пры гэтым мы атрымліваем яшчэ адзін голас на дадатак да расейскага ў эўрапейскіх структурах. Але пра зьмену вэктара зьнешняй палітыкі гаворка ня йдзе. Ёсьць нейкія крыўды, вядома. Бывае...”
Пры гэтым амбасадар Сурыкаў заклікаў палітыкаў вырашаць усе спрэчныя пытаньні, не парушаючы добрасуседзкіх двухбаковых і шматбаковых дачыненьняў.
Расейскі амбасадар ня змог паведаміць, ці прыедзе прэзыдэнт Мядзьведзеў у Менск на сьвяткаваньне 65-годзьдзя вызваленьня Беларусі. А на пытаньне, дзе большая свабода слова — у Беларусі ці ў Расеі, — адказаў:
“Думаю, што някепска было б, каб і там, і там было болей”
