7–9 верасьня ў Менску пройдзе нарада Кансультатыўнай групы па антыдопінгавай Канвэнцыі Рады Эўропы.
У адкрыцьці імпрэзы возьмуць удзел намесьнік міністра спорту і турызму Аляксандар Баравуля і старшы мэнэджэр праграмаў аддзелу спартыўных канвэнцый Рады Эўропы Ліене Казлоўска.
Як паведамілі ў прэсавай службе Рады Эўропы, перадусім будуць абмяркоўвацца пытаньні абазнанасьці прадстаўнікоў спартыўных рухаў Беларусі ў антыдопінгавых праблемах. Таксама будзе акрэсьлена сфэра адказнасьці тых, хто пакліканы гарантаваць чысьціню спорту і справядлівасьць у ім.
8 і 9 верасьня пройдзе сустрэча Кансультатыўнай групы Антыдопінгавай канвэнцыі па адукацыі.
Адкрыюць нараду дырэктар Нацыянальнага антыдопінгавага агенцтва Мальты Люсьен Атард і прадстаўнік Усясьветнага антыдопінгавага агенцтва Тоні Кунігам.
У сустрэчы возьмуць удзел прадстаўнікі антыдопінгавых арганізацый з Аўстрыі, Бэльгіі, Чэхіі, Даніі, Фінляндыі, Нямеччыны, Грэцыі, Ірляндыі, Літвы, Малдовы, Нарвэгіі, Румыніі, Расеі, Славаччыны, Гішпаніі, Вялікай Брытаніі.
Беларусь не ўваходзіць у Раду Эўропы, але ў 2006 годзе далучылася да антыдопінгавай Канвэнцыі.
Міжнародны сэмінар арганізаваны Міністэрствам спорту і турызму Беларусі, Нацыянальным антыдопінгавым агенцтвам і Радай Эўропы.
Сёньня ў «чорным сьпісе» беларускага спорту некалькі дзясяткаў атлетаў, якія «пагарэлі» на забароненых мэтадах падрыхтоўкі. Павелічэньне колькасьці выпадкаў фіксацыі і часовага ці нават пажыцьцёвага адхіленьня ад стартаў стала прычынай заснаваньня Нацыянальнага антыдопінгавага агенцтва Рэспублікі Беларусь.
Сярод асноўных мэтаў — прэвэнтыўныя захады супраць злоўжываньня стымулятарамі яшчэ на стадыі трэніровачнага працэсу, каб потым не чырванець на адказных міжнародных спаборніцтвах.
У розныя часы ў чорных допінгавых сьпісах фігуравалі
- малатабойцы Іван Ціхан, Вадзім Дзевятоўскі, Андрэй Варанцоў,
- штурхальнікі ядра Андрэй Міхневіч, Яніна Карольчык,
- кідальніца дыску Ірына Ятчанка,
- прадстаўнікі барацьбы Андрэй Пікуза, Васіліса Марзалюк,
- плыўчыха Аляксандра Герасіменя,
- цяжкаатлеты Яўген Жарнасек, Міхаіл Аўдзееў, Кацярына Шкуратава, Марына Шкерманкова, Дзіна Сазанавец, Дарʼя Тавелева,
- спартыўная акрабатка Аліса Ўсманава,
- біятляніст Вадзім Сашурын ды іншыя.
