Удзельнікаў акцыі затрымалі па дарозе да Валадаркі. Сярод затрыманых былі журналісты Радыё Свабода і «Нашай Нівы». Усяго затрымалі больш за 10 чалавек.
Міліцыя сарвала акцыю памяці Ігара Пцічкіна, які загінуў у СІЗА № 1 пры нявысьветленых абставінах. Затрыманых журналістаў выпусьцілі днём. Цяжарную сястру Ігара Пцічкіна Ірыну Мірановіч вызвалілі а 17:30, яшчэ зь дзясятак затрыманых — бліжэй да 20-й гадзіны. Ім уручылі позвы ў суд. Затрыманы праваабаронца Андрэй Бандарэнка і яшчэ некалькі затрыманых па стане на 20:00 застаюцца ў пастарунку.
У суполцы вКонтакте, прысьвечанай Ігару Пцічкіну, сваякі прапануюць сабрацца загадзя і прайсьці да «Валадаркі» разам:
«Зьбіраемся ў 12.30 на Нямізе каля царквы, ідзем у бок Валадарскага 2, пры сабе мець гвазьдзікі, маленькую сьвечку, кветкі кладзем ля сьцен СІЗА-1 памінальная хвіліна, пасьля запальваем сьвечкі і ідзем у бок Чырвонага касьцёла, і там канчатковая кропка».
Андрэй Бандарэнка з праваабарончага аб'яднаньня «Плятформы» паведаміў Радыё Свабода, што цяпер дапамагае сваякам у высьвятленьні прычынаў сьмерці Ігара Пцічкіна, яго арганізацыя спраўджвае атрыманыя з розных крыніцаў факты, каб пасьля праверкі агучыць іх.
Менчуку Ігару Пцічкіну быў 21 год. Пцічкіна пакаралі 3 месяцамі арышту за тое, што кіраваў аўтамабілем, ня маючы правоў. Для адбыцьця пакараньня Ігара Пцічкіна зьмясьцілі ў менскі сьледчы ізалятар на вуліцы Валадарскага 30 ліпеня, а ўжо 4 жніўня вязень памёр.
Сваякі Ігара Пцічкіна не паверылі ў вэрсію пра раптоўную сьмерць у выніку спыненьня сэрца. Яны спасылаліся на плямы на целе нябожчыка.
На сустрэчы з начальнікам СІЗА сваякам Ігара Пцічкіна паведамілі, што 3 жніўня ў яго нібыта пачалося «псыхаматорнае ўзбуджэньне», з-за чаго яго мусілі «зафіксаваць мяккімі рамянямі».
Сваякі сабраліся на Нямізе і рушылі ў бок турмы на Валадарскага. Сястра Ігара Пцічкіна дае журналістам інтэрвію. Побач стаяць 3 чалавекі ў цывільным і выклікаюць некага па рацыі.
Перад затрыманьнем. Сястра Ігара Пцічкіна дае імправізаваную прэсавую канфэрэнцыю
На рагу Гарадзкога валу і Нямігі да ўдзельнікаў акцыі пад’ехаў сіні мікрааўтобус з нумар 9427 IK7. Затрымалі ўдзельнікаў акцыі, а таксама карэспандэнта Свабоды Алега Грузьдзіловіча і журналістаў «Нашай Нівы» Ірыну Арахоўскую і Ганну Бадзяку
Журналістаў, якія стаялі побач, адвялі ў бок і сказалі апусьціць камэры. Акцыя закончылася
Стала вядома, што сярод затрыманых — Андрэй Бандарэнка, лідэр праваабарончага аб’яднаньня «Плятформа». Яго арганізацыя дапамагае сям'і праясьніць акалічнасьці сьмерці Пцічкіна.
Карэспандэнт Свабоды дазваніўся да Ірыны Пцічкінай. Паводле яе словаў, затрыманыя знаходзяцца ў Цэнтральным РУУС, ідзе праверка дакумэнтаў, але яшчэ не сказалі, у чым іх абвіначваюць.
Усе знаходзяцца ў адным пакоі, аднак міліцыянты забараняюць размаўляць па мабільным тэлефоне. Пцічкіна сказала, што абыходзіліся з затрыманымі карэктна. На пытаньне, ці выпусьцяць яе раней, паколькі яна цяжарная, Пцічкіна сказала, што гаворкі пра вызваленьне пакуль увогуле не ідзе, па адным заводзяць у пакой, але нічога канкрэтнага ня кажуць.
Фотагалерэя:
Акцыя памяці Ігара Пцічкіна разагнаная
Сваякі запрашалі неабыякавых падыходзіць да турмы на вуліцы Валадарскага і запаліць сьвечкі ў знак памяці Ігара Пцічкіна, які загінуў у турме пры загадкавых акалічнасьцях
15:1414.9.2013
Кіраўнік прэс-службы ГУУС Менгарвыканкаму Аляксандар Ластоўскі на просьбу карэспандэнта Радыё Свабода паспрыяць вызваленьню затрыманых журналістаў «Нашай Нівы» і Радыё Свабода, якія выконвалі свае прафэсійныя абавязкі, адказаў, што ён вельмі заняты іншымі справамі і нічым ня можа дапамагчы.
16:0814.9.2013
Журналістаў выпусьцілі з пастарунку, астатніх затрыманых — не.
16:3514.9.2013
Праз тры гадзіны затрыманых журналістаў адпусьцілі з пастарунку. Хаця фактычна іх ужо падрыхтавалі да адпраўкі на Акрэсьціна — адабралі тэлефоны, прымусілі зьняць гадзіньнікі, пярсьцёнкі, рамяні.
У пастарунку застаюцца сястра Пцічкіна Ірына Мірановіч і сябры: Ігар Кавалёў, Аляксандар Гаўрыш, Віктар Катлянік і Сяргей Яўменаў.
У хлопцаў адкаталі пальцы, узялі адбіткі абутку, сфатаграфавалі ў фас і профіль. Калі карэспандэнт Свабоды Алег Грудзьдзіловіч зь імі разьвітваўся і сказаў «Пакуль, хлопцы, убачымся», міліцыянты пажартавалі: «Праз пару тыдняў».
Сястра Ігара Пцічкіна Ірына Мірановіч на дзявятым месяцы цяжарнасьці, да таго, ж мае маленькага сына, якому няма яшчэ і двух гадоў.
Аляксандар Ластоўскі ўсё ж такі прыехаў у Цэнтральны РУУС і паспрыяў вызваленьню журналістаў.
16:5414.9.2013
Журналісты і Аляксандар Ластоўскі пакідаюць Цэнтральнае РУУС
17:0414.9.2013
Ганна Бадзяка, Ірына Арахоўская і Алег Грузьдзіловіч па выхадзе з Цэнтральнага РУУС
17:0514.9.2013
Паводле прадстаўніцы «Плятформы» Алены Красоўскай-Касьпяровіч, затрыманы праваабаронца, кіраўнік «Плятформы» Андрэй Бандарэнка. Ён зьбіраўся далучыцца да ўдзельнікаў акцыі па ўшанаваньні памяці Ігара Пцічкіна, загінулага 4 жніўня ў СІЗА на Валадарскага. Апошні раз ён патэлефанаў каля 12-й гадзіны і паведаміў, што ўжо на падыходзе, знаходзіцца ля Чырвонага касьцёлу. Цяпер на тэлефанаваньні Бандарэнка не адказвае. Паводле папярэдняй інфармацыі, ён знаходзіцца ў Маскоўскім РУУС.
17:5514.9.2013
Цяжарную Ірыну Мірановіч, сястру Ігара Пцічкіна, а 17:30 выпусьцілі з пастарунку.
