«Мы фактычна ва ўсім сьвеце назіраем прагу да простых рашэньняў, да больш ясных і радыкальных падыходаў. Магчыма, у ЗША гэта зьвязана зь незадаволенасьцю тым, як працуюць дзяржаўныя інстытуты. Калі ж гаварыць пра саму выбарчую кампанію, дык Трамп выглядаў больш рашучым, а Дэмакратычная партыя выглядала занадта асьцярожнай. Гэта магло паўплываць на амэрыканцаў, якія вырашылі, што лепш такая яснасьць, чым калі няма ніякай яснасьці».
Паводле Аляксандра Дабравольскага, казаць, што перамога Дональда Трампа прывядзе да рэзкіх зьменаў у рэгіёне, дзе знаходзіцца Беларусь, зарана.
«Прадказальнасьць Трампа толькі ў тым, што ён непрадказальны. Але што дакладна магу сказаць пра наша, беларускае пытаньне, гэта што беларускія дэмакратычныя сілы маюць аднолькава добрыя кантакты як з Дэмакратычнай, гэтак і з Рэспубліканскай партыямі. Ідзе стратэгічны дыялёг паміж беларускімі дэмакратычнымі сіламі і Злучанымі Штатамі, вось якраз цяпер ідуць пэўныя мерапрыемствы. Гэта робіцца на падставе рашэньняў, які былі прынятыя раней. Таму асабліва хвалявацца ня трэба. Так, спакойнай сытуацыі ня будзе, але ў нас ёсьць шмат напрацовак, таму думаю, што са Злучанымі Штатамі будзе працягвацца сур’ёзная супраца».
Адносна сытуацыі ва Ўкраіне Аляксандар Дабравольскі мяркуе, што падтрымка яе з боку ЗША працягнецца, а Трамп пасьля няўдалых спробаў замірыць бакі можа радыкалізавацца.
«Падазрэньні, што Дональд Трамп — крэатура Масквы, неабгрунтаваныя. Масква, напэўна, спадзявалася на прыход Трампа, бо той казаў, што дапамога Кіеву з боку ЗША будзе зьменшаная, але ня ведаю ніводнага чалавека, які б з дакладнасьцю прадказаў палітыку ЗША адносна Ўкраіны.
Мяркую, так ці інакш падтрымка Ўкраіны працягнецца. Напэўна, трэба чакаць нейкіх крокаў Трампа па ўсталяваньні кантактаў паміж Пуціным і Зяленскім і спробаў гэтую вайну спыніць.
Але пакуль гэта будзе толькі замарозка канфлікту, што не задавальняе ані Ўкраіну, ані Расею. І гэта будзе не разьвязаньне праблемы, а яе адкладаньне. І калі Трамп пабачыць, што ягоныя дзеяньні ня маюць посьпеху, ён можа радыкалізавацца. І тут насамрэч невядома чаго чакаць. У тым ліку і Расеі».
Аляксандар Дабравольскі мяркуе, што беларускі рэжым у новых умовах паспрабуе палепшыць адносіны з адміністрацыяй наймацнейшай краіны сьвету, каб зьняць хаця б частку санкцый. Але ці зможа Лукашэнка гэтага дамагчыся, палітык моцна сумняецца.
«Мяркую, лёс беларускіх уладаў будзе ня самы лепшы з аб’ектыўных прычынаў. Гэтая ўлада ня ў стане разьвязаць праблемы сваёй краіны, вядзе вайну з грамадзтвам Беларусі, фактычна знаходзіцца ў вострым канфлікце з Захадам і ў складаных адносінах нават з Расеяй, якая патрабуе ўсё больш і больш.
Думаю, што найперш усё будзе залежаць ад беларускага грамадзтва і беларусаў у сьвеце. Беларусь павінна заставацца ў міжнародным парадку дня, і гэта наша задача — уплываць на такія рэчы, як стаўленьне да рэжыму.
А рэжым, канечне, паспрабуе палепшыць адносіны з Захадам, бо для яго склалася вельмі цяжкая сытуацыя. Краіна, у якую не лятаюць самалёты, якую не паважаюць, якая ёсьць чорнай дзіркай на мапе сьвету, ня мае добрых пэрспэктываў.
Аднак пытаньне: што рэжым можа прапанаваць у абмен на паляпшэньне стаўленьня да яго? Нахапаць новых закладнікаў і потым прапанаваць іх вызваліць? Толькі гэта. Але ніякай будучыні для беларускага грамадзтва ён прапанаваць ня можа.
Плюс Беларусь застаецца крыніцай дадатковай нестабільнасьці ў сьвеце, які перажывае цяжкія часы. Таму ня ведаю, што можа зацікавіць Трампа ў прапановах з боку рэжыму ў Беларусі.
Для Трампа ўласьцівая нейкая прагматыка, а ніякіх плюсаў ад супрацоўніцтва зь Беларусьсю, мяркую, ня бачна. Беларусь — непрадказальная краіна, якая ўцягнутая ў падтрымку вайны.
Магчыма, што рэжым прапануе нейкае пасярэдніцтва ў адносінах Расеі з Украінай, але, прабачце, ніводзін з бакоў ня лічыць Беларусь уплывовым пасярэднікам», — пракамэнтаваў Аляксандар Дабравольскі.
Прэзыдэнцкія выбары ў ЗША 2024 году
- За перамогу змагаліся два палітыкі: былы прэзыдэнт, 78-гадовы Дональд Трамп, кандыдат ад Рэспубліканскай партыі, і віцэ-прэзыдэнтка, 60-гадовая Камала Гарыс, кандыдатка ад Дэмакратычнай партыі. Па выніках выбараў Дональд Трамп забясьпечыў сабе вяртаньне ў Белы дом.
- Дональд Трамп балятаваўся на пасаду трэці раз. У 2020 годзе ён прайграў Джо Байдэну.
- Трамп стаў другім прэзыдэнтам у гісторыі, які выйграў выбары пасьля перапынку ў кадэнцыях. Адзіным прэзыдэнтам, які дасягнуў гэтага, быў Гровэр Кліўлэнд, яшчэ ў канцы XIX стагодзьдзя.
- Камала Гарыс замяніла Джо Байдэна на выбарах ад Дэмакратычнай партыі. Гэта адбылося пасьля ягонага кепскага выступу на дэбатах з Дональдам Трампам, які падкрэсьліў, што ёсьць прычыны для занепакоенасьці ягоным узростам.
- Гарыс падкрэсьлена падтрымлівала права на аборты пасьля рашэньня Вярхоўнага суду ў 2022 годзе, якое спыніла канстытуцыйнае права на аборты. Гарыс назвала Трампа «пагрозай для дэмакратыі», адзначыўшы ягоную ролю ў нападзе 6 студзеня на Капітолій ЗША і яго адмову прызнаць пройгрыш Байдэну ў 2020 годзе.
- Трамп жа заявіў, што на другім магчымым тэрміне ён зробіць больш для паляпшэньня эканомікі, спыніць хвалю мігрантаў і будзе больш жорсткім у адносінах да супернікаў ЗША, такіх як Кітай.
- Гарыс заявіла, што будзе працягваць палітыку Байдэна ў дапамозе Ўкраіне. Трамп паставіў пад сумнеў падтрымку Ўкраіны, заявіўшы, што Эўропа павінна несьці асноўную частку цяжару падтрымкі Кіева ў змаганьні супраць расейскага ўварваньня.
- Свабода аналізавала, чаму вынік выбараў у ЗША залежыць ад «хісткіх штатаў». Усяго такіх штатаў сем: Пэнсыльванія, Мічыган, Вісконсін, Арызона, Нэвада, Джорджыя і Паўночная Караліна. У 38 штатах адна і тая ж партыя атрымлівае большасьць галасоў на кожных прэзыдэнцкіх выбарах з пачатку XXI стагодзьдзя, часта зь вялікай перавагай. Толькі 12 штатаў «зьмянялі перавагі» хаця б раз з 2000 году.
- У некаторых штатах адна партыя дамінуе яшчэ даўжэй, напрыклад у Мінэсоце з 1976 году большасьць галасоў стабільна атрымлівае кандыдат ад дэмакратаў, а ў Тэхасе з 1980 году перамагае рэспубліканец.
- Таксама ў лістападаўскай кампаніі 2024 году перавыбіраецца траціна Сэнату і ўвесь склад Палаты прадстаўнікоў.
- Сэнат зацьвярджае на пасадах прызначэнцаў прэзыдэнта, у тым ліку судзьдзяў усіх узроўняў, і ратыфікуе міжнародныя пагадненьні. Кожны штат прадстаўляюць два сэнатары — усяго іх сто, тэрмін паўнамоцтваў — шэсьць гадоў. Барацьба ідзе за 34 месцы са 100 наяўных.
- Палата прадстаўнікоў традыцыйна адыгрывае ключавую ролю ў працы над бюджэтам ЗША і сфэрай падаткаў, а таксама мае права ініцыяваць працэдуру імпічмэнту фэдэральным службовым асобам, уключаючы прэзыдэнта. Цяпер у Палаце засядаюць 435 кангрэсмэнаў, тэрмін кадэнцыі якіх складае два гады. Яны прадстаўляюць 50 штатаў, а таксама Фэдэральную акругу Калюмбія (мае дарадчы голас) і пяць тэрыторый ЗША.
Форум