У Менску за камэнтары пра Лукашэнку затрымалі грамадзяніна Ізраіля
Затрымліваць мужчыну прыйшлі як мінімум шэсьць сілавікоў у поўным рыштунку. На відэа відаць, што разам зь ім з кватэры вывелі яшчэ нейкага чалавека, паведамляе праваабарончы цэнтар «Вясна».
На відэа сілавікоў затрыманы кажа, што ў 2020 годзе напісаў 18 нэгатыўных камэнтароў у адрас Лукашэнкі і сакратара Савету бясьпекі. ТГ-канал сілавікоў паведамляе, што затрыманы — грамадзянін Ізраіля.
У Віцебску са стралянінай затрымалі мужчыну. Сілавікі сьцьвярджаюць, што ён мае пашпарты Ўкраіны і ЗША
У Віцебску сілавікі са стралянінай затрымалі мужчыну. Відэа з затрыманьнем апублікаваў адзін з блізкіх да сілавікоў тэлеграм-канал.
У апісаньні відэа гаворыцца, што затрыманага завуць Мікалай і што ён у 2020 годзе прыехаў на ПМЖ у Беларусь, але не ўдакладняецца, зь якой краіны.
Сьцьвярджаецца, што ў яго нібыта знайшлі пашпарты Ўкраіны і ЗША. Таксама сілавікі на відэа паказваюць вокладку пасьведчаньня аб заканчэньні інстытута павышэньня кваліфікацыі Генэральнай пракуратуры Ўкраіны, але непасрэдных доказаў, што пасьведчаньне належыць затрыманаму, няма. Таксама сілавікі сьцьвярджаюць, што падчас ператрусу ў мужчыны нібыта «знайшлі амэрыканскае „шпіёнскае“ абсталяваньне для глыбокага ўкараненьня» — але на відэа яго не паказваюць.
Прапагандысты заявілі, што цяпер мужчына знаходзіцца ў ІЧУ і што на яго склалі чатыры адміністрацыйныя пратаколы і завялі крымінальную справу. Паводле якіх артыкулаў — не паведамляецца.
«Медиазона» знайшла старонку затрыманага ва «Укантакце», там ён падпісаны як Alex Sanders. У якасьці роднага горада ўказаны Наваполацак. На старонцы мужчыны ёсьць фота каля помніка, які ўсталяваны ў Гарадку Віцебскай вобласьці. На фота пазначаная дата — 2015 год.
Пачалі судзіць гульца ў покер, які ўдзельнічаў у чэмпіянаце Беларусі — меркавана, за падтрымку Ўкраіны
Суд над Міхаілам Фандо пачаўся 17 кастрычніка ў Менскім гарадзкім судзе, паведамляе «Вясна».
Яго, як мяркуецца, абвінавачваюць у падтрымцы Ўкраіны — суд адбываецца па артыкуле «дапамога ці іншае матэрыяльнае забесьпячэньне вайны» (ч. 2 арт. 361-3 КК). Судзіць мужчыну будзе Любоў Сімахіна, якая выносіць палітычныя прысуды з 2011 году.
Міхаіл Фандо родам з Барысава, але жыў у Менску з часоў унівэрсытэта, піша «Наша Ніва». Вучыўся ў БДУ на мэнэджара. Інфармацыі пра яго няшмат. Вядома, што Фандо — аматар покера, вядомы пад мянушкай Rattly. Ён гуляў у шматлікіх чэмпіянатах, у тым ліку чэмпіянаце Беларусі.