Расейскія войскі ў ноч на 26 верасьня атакавалі дронамі і ракетамі 14 абласьцей Украіны — адзін чалавек загінуў і сама меней 8 атрымалі раненьні.
Расейцы выпусьцілі амаль 80 дронаў і шэсьць ракет
У апэратыўным камандаваньні Паветраных сіл Украіны паведамілі, што Расея зь Белгарадзкай вобласьці атакавала Сумскую вобласьць дзьвюма ракетамі, тып якіх пакуль ня высьветлілі, і чатырма авіяцыйнымі ракетамі з акваторыі Чорнага мора — Адэскую вобласьць. На Адэшчыне загінула 62-гадовая жанчына.
Апроч таго, расейцы выпусьцілі 78 ударных дронаў, зь якіх 66 зьбілі ўкраінскія сродкі супрацьпаветранай абароны.
Дроны зьбівалі над Днепрапятроўскай, Харкаўскай, Кіеўскай, Чаркаскай, Кіраваградзкай, Віньніцкай, Хмяльніцкай, Івана-Франкоўскай, Сумскай, Палтаўскай, Мікалаеўскай, Адэскай, Херсонскай і Харкаўскай абласьцямі.
У Беларусь заляталі прыблізна 4 расейскія дроны
Telegram-канал «Беларускі Гаюн» паведаміў, што ў мінулую ноч у Беларусь заляцелі ня менш за 4 расейскія дроны.
Згодна з паведамленьнем, адзін зь іх перасек мяжу Беларусі ў раёне Любеч (Чарнігаўская вобласьць) у 00:13 і праз 30 хвілін вярнуўся ва Ўкраіну.
Яшчэ тры бесьпілётнікі перамяшчаліся на тэрыторыю Беларусі ў 02:29, 03:05 і 03:52. Адзін дрон нібыта перамяшчаўся ў кірунку Гомля, але што зь ім адбылося пазьней, невядома.
«Беларускі Гаюн» таксама паведаміў, што цягам ночы ў паветры над паўднёвым усходам Беларусі дзяжурылі два зьнішчальнікі, якія падымаліся з аэрадрому ў Баранавічах.
У апэратыўным камандаваньні Паветраных сіл Украіны паведамлялі, што ў некалькіх украінскіх рэгёінах згубілі сыгналы некалькі расейскіх дронаў.
«Восем варожых бесьпілётнікаў лякацыйна згубілі ў некалькіх рэгіёнах Украіны (інфармацыі пра пацярпелых ці разбурэньні не атрымлівалі). Адзін вярнуўся ў Расею, яшчэ адзін застаецца ў паветранай прасторы Ўкраіны, ідзе баявая работа», — адзначаецца ў афіцыйным паведамленьні.
Пад прыцэлам — крытычная энэргетычная інфраструктура і жылыя раёны
У Кіеве аскепкі бесьпілётнікаў упалі на тэрыторыю дзіцячага садка і пашкодзілі 20 аўтамабіляў, у адным з жылых дамоў пашкоджаны газаправод. Аб пацярпелых не паведамляюць.
У Запарожжы 8 чалавек, у тым ліку непаўналетні хлопчык, атрымалі раненьні, зруйнаваныя 11 прыватных будынкаў і адзін трохпавярховік, зь якога эвакуавалі 18 жыхароў.
У Адэскай вобласьці загінула 62-гадовая жанчына, пашкоджаны будынкі і аўтамабілі.
У Мікалаеўскай вобласьці расейцы атакавалі энэргетычную інфраструктуру, частка спажыўцоў засталіся без электраэнэргіі.
У Івана-Франкоўску ўдары накіравалі на цывільную і крытычную інфраструктуру. У выніку цэнтар гораду застаўся без энэргазабесьпячэньня.
На лінях фронту адбылося амаль 5 тысяч абстрэлаў
У Генэральным штабе Ўзброеных сіл Украіны паведамілі, што за апошнія 24 гадзіны на лініях фронту адбылося 189 баявых сутыкненьняў, якія суправаджаліся абстрэламі з артылерыі і баявой авіяцыі. Па ўкраінскіх пазыцыях расейцы нанесьлі больш за 4600 удараў.
На пакроўскім кірунку ўкраінцы спынілі 54 штурмы і наступы. Амаль палова зь іх адбылася пад Сялідавым. Расейцы адначасова абстрэльвалі гэты горад кіраванымі авіябомбамі.
Яшчэ восем штурмаў адбылося недалёка ад Вуглядару і Вадзянога.
У Расеі ўкраінскія дроны зьбівалі над трыма рэгіёнамі
У Міністэрстве абароны Расеі паведамілі, што Ўкраіна атакавала дронамі тры вобласьці — Белгарадзкую, Курскую і Бранскую.
Найбольш (7) бесьпілётнікаў зьбілі над Белгарадзкай вобласьцю, два — над Бранскай і адзін — над Курскай.
У той жа час губэрнатар Белгарадзкай вобласьці Вячаслаў Гладкоў удакладніў, што расейскія сілы СПА зьбілі над Белгарадзкім раёнам 8 з 10 дронаў і над Шабекінскай гарадзкой акругай — 5 з 8. Паводле кіраўніка рэгіёну, адзін чалавек зьвярнуўся з траўмай, ёсьць разбурэньні ў прыватным сэктары, пашкоджаныя аўтамабілі, лінія электраперадач і крама.
Улады Курскай вобласьці не паведамілі аб наступствах падзеньня бесьпілётнікаў ці іхных аскепкаў, у Бранскай — без разбурэньняў і пацярпелых.
Ва ўмовах вайны незалежна пацьвердзіць або зьняпраўдзіць інфармацыю немагчыма.
Расея ад пачатку свайго ваеннага ўварваньня ва Ўкраіну прыцэльна наносіць удары па жылых кварталах, аб’ектах сацыяльнай і энэргетычнай інфраструктуры. Кіраўніцтва Расеі гэта зьняпраўджвае.
Улады Ўкраіны і міжнародныя арганізацыі кваліфікуюць гэтыя ўдары як ваенныя злачынствы Расеі, якія маюць мэтанакіраваны характар.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум