Украінскія войскі адступаюць. Экспэрты мяркуюць, што захоп Вуглядару ня створыць для расейцаў апэратыўных пераваг для далейшага наступу.
У Генэральным штабе Ўзброеных сіл Украіны паведамілі аб складанай сытуацыі на лініі фронту. Расейцы выкарыстоўваюць сваю перавагу ў жывой сілы і тэхніцы і бесьперапынна атакуюць украінскія пазыцыі. За апошнія 24 гадзіны зафіксавалі 154 баявыя сутыкненьні.
Расейцы наступаюць адразу на Пакроўск і Вуглядар
Паводле ўкраінскіх вайскоўцаў, на пакроўскім кірунку ўдалося спыніць 25 штурмаў і наступаў расейцаў. У раёнах Вуглядару, Кацярынаўкі, Вадзянога і Паўлаўкі расейцы штурмавалі ўкраінскія пазыцыі восем разоў пры дапамозе баявой авіяцыі.
Вакол Вуглядару сытуацыя крытычная і працягвае ўскладняцца. Аналітыкі DeepStateUA сьцвярджаюць, што расейцы ператвараюць Вуглядар у руіны, абстрэльваючы яго з артылерыі і авіяцыі. Паводле іх, расейцы намагаюцца ўзяць горад у атачэньне.
Вуглядар два гады запар абараняе 72-я брыгада Ўзброеных сіл Украіны. У студзені і лютым 2023 году гэты падразьдзел, нягледзячы на перавагу ў сілах расейцаў, змог іх спыніць.
«Але нават нашмат лепш аснашчаная брыгада ня можа трымаць абарону вечна, а два гады — гэта вялікі тэрмін для вядзеньня баявых дзеяньняў без адпачынку», — напісаў аналітык Forbes Дэвід Акс. Паводле яго, расейская армія працягвае прасоўвацца на поўнач ад гораду.
Інстытут вывучэньня вайны: расейская армія не атрымае пераваг нават пасьля захопу Вуглядару
Экспэрты амэрыканскага Інстытуту вывучэньня вайны (ISW) паведамілі, што расейскія войскі ўжо кантралююць большасьць асноўных дарог, якія вядуць да Вуглядару.
«Але магчымы захоп Расеяй Вуглядару наўрад ці істотна зьменіць ход наступальных апэрацыяў на захадзе Данецкай вобласьці і [...] не абавязкова дасьць расейскім сілам выгадную пазыцыю для пачатку наступальных апэрацый у іншых месцах на захадзе Данецкай вобласьці. Вуглядар знаходзіцца за 23 кілямэтры на поўдзень ад шашы Н-15, якая вядзе з Данецку ў памежную зону з Запароскай вобласьцю, але тэрыторыя паміж Вуглядарам і шашой у асноўным складаецца з адкрытых палёў, якія запатрабавалі б ад расейцаў правядзеньня пасьпяховых мэханізаваных штурмаў», — адзначаецца ў справаздачы ISW за 24 верасьня.
Экспэрты мяркуюць, што хуткасьць захопу расейцамі ўсяго горада «будзе часткова залежаць ад рашэньня Ўкраіны».
«Калі ўкраінскае камандаваньне вырашыць, што рызыка расейскага атачэньня Вуглядару або рэсурсы для абароны ў гарадзкіх баях занадта вялікія, украінскія сілы могуць адысьці, што дазволіць расейскім сілам захапіць яго параўнальна хутка і без уступленьня ў блізкія баі. Аднак калі ўкраінскія сілы вырашаць абараняць Вуглядар і змогуць перашкодзіць расейскім намаганьням яго атачыць, расейскім сілам можа быць цяжка змагацца за горад, які ўкраінскія сілы ўмацоўвалі больш за два гады. Калі расейцы ня возьмуць горад адносна хутка, на іхныя манэўры ўздоўж флянгаў Вуглядару таксама можа паўплываць пачатак восеньскіх дажджоў, што значна ўскладніць прасоўваньне па пераважна сельскай і сельскагаспадарчай мясцовасьці вакол горада», — патлумачылі аналітыкі ISW.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум