Кітайская вайсковая дэлегацыя прыбыла ў Беларусь для абмеркаваньня супрацоўніцтва ў сфэры тылавога забесьпячэньня ўзброеных сіл дзьвюх краін, паведаміў памочнік міністра абароны Беларусі ў пытаньнях міжнароднага вайсковага супрацоўніцтва Валеры Равенка.
«У Беларусь прыбыла дэлегацыя Абʼяднаных сіл матэрыяльна-тэхнічнага забесьпячэньня Народна-вызваленчай арміі Кітая. У рамках візыту пройдуць перамовы аб двухбаковым супрацоўніцтве ў матэрыяльна-тэхнічным забесьпячэньні беларускіх узброеных сіл і НВАК Кітая», — напісаў Равенка ў сацсетцы Х.
Кітай праводзіць вучэньні з Беларусьсю і Расеяй
Тым часам беларускія і кітайскія вайскоўцы праводзяць з 8 па 19 ліпеня на палігоне «Берасьцейскі» каля мяжы Беларусі з Польшчай сумесныя антытэрарыстычныя вучэньні «Арол, які атакуе», паведамілі раней у Мінабароны Беларусі.
Вучэньне «дазволіць беларускім і кітайскім падразьдзяленьням абмяняцца досьведам, правесьці апэратыўнае ўзаемадзеяньне, а таксама стварыць аснову для наступнага разьвіцьця беларуска-кітайскіх адносін у сумеснай ваеннай падрыхтоўцы», гаворыцца ў паведамленьні.
Міністэрства абароны Кітая заявіла, што пачалі вучэньні і з Расеяй пад назвай Joint Sea-2024, яны працягнуцца да сярэдзіны гэтага месяца.
Паводле ўладаў Кітая, вучэньні ў водах і паветранай прасторы на поўдні правінцыі Гуандун павінны «прадэманстраваць рашучасьць і магчымасьці абодвух бакоў у сумесным супрацьстаяньні пагрозам марской бясьпекі і захаваньні глябальнага і рэгіянальнага міру і стабільнасьці», заявіла Міністэрства абароны Кітая.
У заяве дадаецца, што вучэньні «яшчэ больш паглыбяць кітайска-расейскае ўсебаковае стратэгічнае партнэрства каардынацыі для новай эры».
Рэакцыя на Захадзе
Краіны часта арганізуюць свае сумесныя вучэньні, каб супадаць з падзеямі за мяжой — не ў апошнюю чаргу Кітай, заявіла агенцтву AFP Эліс Экман, старшы аналітык па Азіі Інстытуту дасьледаваньняў бясьпекі Эўрапейскага зьвязу (EUISS).
«У красавіку 2023 году кітайцы правялі вучэньні з Расеяй ва Ўсходне-Кітайскім моры, недалёка ад Японскіх астравоў, напярэдадні трохбаковага саміту ЗША, Японіі і Паўднёвай Карэі, каб паказаць сваю апазыцыю правядзеньню такога саміту», — сказала Экман AFP.
Падобным чынам Кітай арганізаваў вайсковыя манэўры ў Паўднёва-Кітайскім моры ў траўні 2024 году, калі сустрэча ЗША, Японіі, Філіпінаў і Аўстраліі была ў самым разгары, дадала яна.
Пэкін занепакоены пашырэньнем ролі Альянсу ў Азіяцка-Ціхаакіянскім рэгіёне, і без таго кепскія адносіны працягваюць пагаршацца.
Прычыны набываюць «усё больш стратэгічны характар, паколькі пагроза з боку Кітаю становіцца неад’емнай часткай стратэгічнага мысьленьня арганізацыі», дадала Экман.
Форум