Нечаканы крок узмацніў спэкуляцыі наконт таго, хто стане наступнымі лідэрамі ЭЗ, калі ў лістападзе пачнуцца перамовы аб новым раўндзе найвышэйшых пасад, піша AFP.
Прэзыдэнт Эўракамісіі Урсуля фон дэр Ляен зь Нямеччыны, якая, як і Мішэль, заступіла на сваю пасаду ў 2019 годзе, пакуль нічога не казала, ці мае намер балятавацца на другі тэрмін.
У якасьці старшыні Эўрапейскай рады адной з галоўных задач Шарля Мішэля было назіраньне за самітамі ЭЗ, якія сталі вырашальнымі для пошуку сумесных мер рэагаваньня на крызісы, уключаючы пандэмію Covid-19 і ўварваньне Расеі ва Ўкраіну.
«Праз чатыры гады пасьля пачатку маіх паўнамоцтваў у якасьці эўрапейскага лідэра, гэта мая адказнасьць, каб даць справаздачу аб працы за апошнія гады, і прапанаваць праект для будучыні Эўропы», — заявіў Мішэль бэльгійскім СМІ.
Ён сказаў, што ўзначаліць сьпіс лібэральнай партыі Рэфармісцкі рух, якой ён раней кіраваў.
«Гэта азначае, што я буду працягваць сваю працу ў якасьці старшыні Эўрапейскай рады да прысягі ў якасьці дэпутата Эўрапарлямэнту 16 ліпеня», — сказаў ён.
Парлямэнцкія выбары, прызначаныя на 6-9 чэрвеня ў 27 краінах-сябрах ЭЗ, выберуць агулам 720 дэпутатаў. Экспэрты прагназуюць жорсткую барацьбу за кіраўніцтва эўрапейскімі інстытутамі, у тым ліку за пасады камісараў ЭЗ і сяброў Эўрапейскай рады.
