Як напісаў губэрнатар Гладкоў у тэлеграме, вёска нібыта знаходзіцца пад абстрэлам украінскіх вайскоўцаў. Таксама, паводле Гладкова, пашкоджаныя лініі электраперадачы ў некалькіх вёсках.
Цярэбрана знаходзіцца непадалёк ад мяжы з Сумскай вобласьцю Ўкраіны, якая рэгулярна церпіць ад абстрэлаў з сумежнай тэрыторыі Расеі. Ці значыць фраза аб баі «на мяжы вёскі» тое, што ўкраінскія вайскоўцы перасеклі мяжу, незразумела. Украінскія вайскоўцы аб баях у гэтым раёне не паведамлялі.
Расейскі тэлеграм-канал «База» сьцьвярджае, што бой пачаўся каля 11-й раніцы.
«У Цярэбрана жывуць каля 200 чалавек, жыхароў не эвакуавалі, цяпер людзі хаваюцца па хованках», — піша расейскае выданьне «База».
Так званы Рускі добраахвотніцкі корпус, які ваюе на баку Ўкраіны, раней браў на сябе адказнасьць за рэйды ў прымежныя рэгіёны Расеі, у прыватнасьці ў Бранскую і Белгарадзкую вобласьці. У час найбольш буйнога зь іх у пачатку чэрвеня на нейкі час быў узяты пад кантроль шэраг вёсак у Грайваронскім раёне Белгарадзкай вобласьці, Цярэбрана разьмешчана недалёка ад гэтага раёна. Аб баі ў Цярэбрана РДК нічога ня піша.
