Польшча і Беларусь зараз знаходзяцца ў «стане высокай напружанасьці», канстатаваў ён. «Час ад часу мы сутыкаемся з правакацыямі рознага роду з боку рэжыму [Аляксандра Лукашэнкі]. У гэтым выпадку мы таксама маем справу з правакацыяй», — цытуе чыноўніка польскае інфармагенцтва PAP.
Паводле слоў Каміньскага, «сытуацыя патрабуе вельмі глыбокага маніторынгу таго, што адбываецца ў Беларусі», дзе гэтымі днямі праходзяць вучэньні з удзелам расейскіх войскаў, у тым ліку каля польскай мяжы — у раёне Берасьця.
«У нас сабраныя буйныя сілы, якія хутка і адэкватна адрэагуюць на сытуацыю», — папярэдзіў чыноўнік. Ён таксама нагадаў, што Польшча і краіны Балтыі дамовіліся пра «неадкладную агульную рэакцыю» у выпадку сур’ёзнага інцыдэнту на межах гэтых дзяржаў з Беларусьсю.
- 1 верасьня Дзяржаўны памежны камітэт Беларусі заявіў пра парушэньне паветранай прасторы польскім ваенным верталётам Мі-24 у Бераставіцкім раёне (Горадзенская вобласьць). Сьцьвярджалася, што баявая машына перасекла мяжу на вельмі малой вышыні, заляцела ўглыб Беларусі на адлегласьць да 1,2 км, а потым вярнулася назад.
- Праз часовага паверанага ў справах Польшчы Войцэха Філімановіча МЗС Беларусі запатрабавала ад Варшавы тлумачэньняў і ўважлівага расьсьледаваньня інцыдэнту.
- Намесьнік кіраўніка польскага МЗС Павел Яблоньскі заявіў, што Варшава «прааналізуе сытуацыю», не выключыўшы, што здарэньне можа быць правакацыяй.
- 2 верасьня прэс-сакратар апэратыўнага камандаваньня Узброеных сіл Польшчы Яцэк Гарышэўскі назваў паведамленьні пра парушэньне польскім верталётам паветранай прасторы Беларусі «адкрытай хлусьнёй і правакацыяй». «Камандаваньне вывучыла сытуацыю і высьветліла, што такога інцыдэнту не было», — сказаў ён.
- Роўна за месяц да інцыдэнту, 1 жніўня, Польшча заявіла пра парушэньне паветранай прасторы краіны двума беларускімі вайсковымі верталётамі. Міністар абароны Марыюш Блашчак у сувязі з гэтым даручыў павялічыць колькасьць вайскоўцаў на мяжы з Беларусьсю і выдзеліць дадатковыя сілы і сродкі, у тым ліку баявыя верталёты. Афіцыйны Менск факт парушэньня не прызнаў.
