«Вось, як мы і абяцалі — наша навінка, сямнаццатая кніга нашага выдавецтва. „Плошча Перамогі“ Альгерда Бахарэвіча — кніга, дзея якой сама просіцца на сцэну або на экран. Купалаўцы ўжо заявілі, што паставяць паводле яе спэктакль. А пакуль што можна пачытаць — і ўявіць сабе спэктакль або і фільм у сваёй галаве, — паведамляе выдавецтва на сваёй старонцы ў Фэйсбуку. — Кніга ўжо выходзіла ў электронным фармаце, але нам падалося, што яна вартая таго, каб яе можна было патрымаць у руках, панюхаць сьвежую друкарскую фарбу, паставіць у добрае месца на паліцы. Неўзабаве — ва ўсіх нашых традыцыйных месцах продажу».
А вось што піша на сваёй старонцы ў Фэйсбуку сам Альгерд Бахарэвіч:
«„Плошчу Перамогі“ я напісаў увесну 2021-га ў Грацы, неўзабаве яна зьявілася ў электроннай вэрсіі, на яе выйшла нямала, з увагі на становішча, добрых водгукаў, а яшчэ гэта найлепшая кніга прозы 2021 году паводле Радыё Свабода. Сёлета Купалаўцы зьбіраюцца паставіць яе на сцэне. Карацей, кніжку ўжо можна замаўляць, купляць і чытаць — на паперы, як і прасілі многія з вас. Вось жа, уяві сабе лясную дарогу...»
- «Vesna Books/Выдавецтва Вясна» — незалежнае выдавецтва, задуманае як працяг — хай сабе і сьціплы — слаўнай традыцыі беларускага кнігадрукаваньня ў Празе. Як адзначаюць дырэктарка выдавецтва Весна Вашко і рэдактар, перакладчык Сяргей Шупа, яны стараюцца выдаваць літаратуру высокай якасьці, як арыгінальную, гэтак і перакладную.
