Імпрэзу арганізаваў Фонд Фрыдрыха Наўмана.
«Лёсы Беларусі і Ўкраіны перапляліся. Без свабоднай Украіны ня будзе свабоднай Беларусі, без свабоднай Беларусі ніколі ня будзе бясьпечнай Украіны», — падкрэсьліла дэмакратычная лідэрка. Яна перакананая, што «вольная Беларусь стане вялікай падмогай для Ўкраіны і наймацнейшай санкцыяй супраць Пуціна».
«Пуцін хацеў зрабіць Украіну такой жа, як сёньняшняя Беларусь: цалкам кантраляванай марыянэткавай дзяржавай са слабым і пакорлівым урадам, — сказала Ціханоўская. — Але ў адрозьненьне ад Лукашэнкі, які схіліўся перад Пуціным, украінскі ўрад і народ сталі на абарону сваёй краіны».
Палітык нагадала пра пляны Пуціна разьмясьціць на тэрыторыі Беларусі ядзерную зброю. Гэта, на яе думку, ня толькі зробіць «закладнікамі двух злачынных рэжымаў» усё насельніцтва Беларусі і створыць «крыніцу пастаяннай пагрозы» для Эўропы, Украіны і іншых краін, але і забясьпечыць Расеі «кантроль над Беларусьсю на гады».
«Мы ня мусім дапусьціць, каб гэта адбылося», — заклікала Ціханоўская.
Дэмакратычная лідэрка Беларусі чарговы раз расказала пра беларускія пратэсты і «бязьлітасны тэрор», барацьбу беларусаў «ня толькі супраць рэжыму, але і супраць дзеяньняў Пуціна», адзначыла ўнёсак «беларускіх добраахвотнікаў і партызан» унутры краіны ў будучую перамогу Ўкраіны, расказала пра турэмныя тэрміны, да якіх прыгаворваюць у Беларусі крытыкаў вайны.
«Кашмар у сэрцы Эўропы працягваецца да гэтага часу», — падкрэсьліла Сьвятлана Ціханоўская, адзначыўшы пры гэтым, што «ўзровень рэпрэсій сьведчыць пра ўразьлівасьць рэжыму».
«Рэжыму не ўдалося перагарнуць старонку і ўзяць сытуацыю пад кантроль. Ён павінен узмацняць рэпрэсіі, бо разумее: калі яны спыняцца, тысячы людзей зноў выйдуць на вуліцы», — дадала палітык.
Ціханоўская заклікала падзяляць рэжым Лукашэнкі і беларусаў, якія не падтрымліваюць «генацыдную вайну Расеі», а Ўкраіне даць «усё неабходнае для перамогі ў гэтай вайне».
Яна падкрэсьліла, што «барацьба за свабоду мае глябальны характар». «Мы ня можам перамагчы паасобку, — перакананая палітык. — Дэмакратыя перамагае, калі мы ўсе разам супрацьстаім тыраніі. Калі мы саступім дыктатарам і дазволім ім тэрарызаваць свой народ, яны працягнуць пагражаць сваім суседзям, а затым і ўсяму сьвету. Гэта тое, што адбылося ў Беларусі».
«Я разумею, што сытуацыю ў нашай краіне за нас ніхто ня зьменіць. Гэта нашая задача. Але з вашай дапамогай гэта будзе хутчэй і прасьцей. Я заклікаю вас працягваць падтрымліваць барацьбу Беларусі і Ўкраіны за свабоду», — падкрэсьліла Ціханоўская, дадаўшы, што тым самым будзе гарантаваная абарона Эўропы, яе бясьпека і дэмакратыя.
Дэмакратычная лідэрка заклікала падтрымліваць грамадзян Беларусі, якія ўцякаюць ад рэпрэсій, дапамагаць тым, хто змагаецца за свабоду, выказваць салідарнасьць зь беларусамі любымі спосабамі.
Палітык таксама заклікала дапамагчы «прыцягнуць бандытаў рэжыму да адказнасьці».
«Яны павінны ведаць, што кожнае злачынства задакумэнтаванае, за кожным рушыць усьлед пакараньне. Мы павінны патрабаваць трыбуналу ня толькі над Пуціным, але і над яго марыянэткай Лукашэнкам. Мы павінны спыніць беспакаранасьць. Мы не шукаем помсты, мы шукаем справядлівасьці», — падкрэсьліла Ціханоўская.
Яна выказала надзею на тое, што Беларусь аднойчы здабудзе «гісторыю посьпеху», стане «прыкладам для перайманьня».
Раней сёньня Сьвятлана Ціханоўская сустрэлася з удзельнікамі новай парлямэнцкай групы «За дэмакратычную Беларусь», якая зьявілася ў Бундэстагу. Ціханоўская папрасіла нямецкіх дэпутатаў павялічыць дапамогу беларусам і ўзмацніць ціск на рэжым Лукашэнкі.
Паводле яе, падтрымка нямецкіх парлямэнтароў «цяпер патрэбная як ніколі». Яна адзначыла, што ў Беларусі штодня затрымліваюць у сярэднім па 17 чалавек, рэпрэсіі сталі «яшчэ больш жорсткімі, чым на піку пратэстаў у 2020 годзе».
Санкцыі супраць Беларусі за падтрымку расейскай вайны ва Ўкраіне
Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.
Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».
26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.
28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.
Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.
У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.
Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.
Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.
5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.
6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».
8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».
Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.
Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.
Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.
Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.
9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.
22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.
28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.
20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.
