Улады Нідэрляндаў 18 лютага афіцыйна паведамілі аб сваім рашэньні закрыць консульства краіны ў Санкт-Пецярбургу і скараціць колькасьць расейскіх дыпляматаў, якія працуюць у пасольстве Расеі ў Гаазе.
«Расея працягвае спробы ўкараніць агентаў сваёй выведкі ў Нідэрляндах пад дыпляматычным прыкрыцьцём», — заявіў міністар замежных спраў Вопке Гукстра.
У той жа час, паводле яго слоў, Масква адмаўляецца прадаставіць візы нідэрляндзкім дыпляматам для працы ў консульстве ў Пецярбургу або ў пасольстве ў Маскве.
У Амстэрдаме адзначылі, што рашэньне абмежаваць колькасьць расейскіх дыпляматаў прынялі з улікам таго, каб іх штат адпавядаў колькасьці супрацоўнікаў у амбасадзе Нідэрляндаў у Маскве.
«Таму шэраг расейскіх дыпляматаў павінен пакінуць краіну на працягу двух тыдняў», — гаворыцца ў заяве МЗС Нідэрляндаў без указаньня, колькі менавіта прадстаўнікоў зараз павінны выехаць.
Урад Нідэрляндаў таксама распарадзіўся закрыць да 21 лютага расейскае гандлёвае прадстаўніцтва ў Амстэрдаме.
У МЗС Расеі заявілі РІА Новости, што Масква адкажа на рашэньне Нідэрляндаў скараціць колькасьць расейскіх дыпляматычных супрацоўнікаў.
Летась увесну Нідэрлянды абвясьцілі аб высылцы 17 расейскіх дыпляматаў з-за падазрэньняў у працы на выведку. Аналягічныя рашэньні тады прынялі Бэльгія, Ірляндыя і Чэхія.
Пасьля высылкі ў Нідэрляндах на той час заставаліся 58 акрэдытаваных расейскіх дыпляматаў.
