Паводле гэтых артыкулаў ужо вынесьлі тры прысуды: адзін, за дэзэртырства, — у Мурманску, і два за самавольнае пакіданьне часткі — у Вялікім Ноўгарадзе і Салнечнагорску, піша «Мэдыязона».
14 сьнежня Мурманскі гарнізонны вайсковы суд вынес прысуд вайскоўцу Максіму Малышаву — яго вінавацілі ня толькі ў дэзэртырстве ў пэрыяд мабілізацыі, але і ў замаху на незаконнае перасячэньне мяжы. Тэкст прысуду, піша выданьне, на сайце суду не апублікаваны, а ў судзе адмовіліся паведаміць дэталі, спаслаўшыся на тое, што працэс адбываўся ў закрытым рэжыме.
7 сьнежня Салнечнагорскі гарнізонны вайсковы суд вынес вырак за самавольнае пакіданьне часткі вайскоўцу Аляксею Сазонаву. Яму, як паведаміў адвакат асуджанага, прызначылі чатыры гады пазбаўленьня волі ўмоўна.
Днём раней Вяліканоўгарадзкі гарнізонны вайсковы суд асудзіў вайскоўца Данілу Іванова на пяць гадоў пазбаўленьня волі ўмоўна. Адвакат Іванова паведаміў «Мэдыязоне», што яго падабаронны самавольна пакінуў вайсковую частку ў Белгарадзкай вобласьці яшчэ ў канцы красавіка, а потым добраахвотна вярнуўся ў яе 26 верасьня, пасьля абвяшчэньня ў Расеі «частковай» мабілізацыі. Адвакат адмовіўся ўдакладняць, ці ўдзельнічаў Іваноў у баях ва Ўкраіне перад уцёкамі.
- 24 верасьня прэзыдэнт Расеі Ўладзімір Пуцін падпісаў закон аб узмацненьні пакараньняў за злачынствы ў пэрыяд мабілізацыі і ва ўмовах узброенага канфлікту, а таксама аб увядзеньні крымінальнага пакараньня за добраахвотную здачу ў палон і марадэрства.
- Згодна з расейскім законам, у выпадку самавольнага пакіданьня часткі тэрмінам ад двух да 10 дзён парушальніку пагражае да 5 гадоў пазбаўленьня волі (раней да 1 году); ад 10 дзён да аднаго месяца — да 7 гадоў пазбаўленьня волі (раней да 3 гадоў); больш за месяц — ад 5 да 10 гадоў пазбаўленьня волі (раней да 5 гадоў).
