У лістападзе Лукашэнка заяўляў, што «дырэктыва выканана, далей дзейнічае пастанова ўраду, якая ўвяла сыстэму цэнаўтварэньня», і «няма патрэбы ў дырэктыве, яна выканана», зьвяртае ўвагу Zerkalo. Аднак цяперашняе рашэньне па адміністрацыйнай адказнасьці па цэнах «накіравана на рэалізацыю дырэктывы».
Уводзіцца адміністрацыйная адказнасьць за адсутнасьць у таварных дакумэнтах інфармацыі аб фармаваньні цэнаў на тавары або ўказаньне няпоўных або недакладных зьвестак.
«За дадзеныя парушэньні будзе прымяняцца штраф у памеры да 20 базавых велічыняў (640 рублёў), а для суб’ектаў гаспадараньня — да 10% сумы грашовай ацэнкі гаспадарчай апэрацыі, адлюстраванай у таварных дакумэнтах», — перадае прэс-служба Лукашэнкі.
Як паведамляецца, указ павінен «забясьпечыць абарону інтарэсаў грамадзян, а таксама пастаўку на ўнутраны спажывецкі рынак тавараў па эканамічна абгрунтаваных цэнах».
