Да пачатку расейскага ўварваньня ва Ўкраіну 24 лютага краіны Захаду «зрабілі ўсё», каб прадухіліць гэтую вайну, але прэзыдэнт Расеі Ўладзімір Пуцін у адказ «сарваў гэтыя мірныя перамовы» і «ўжо паўгода нішчыць ні ў чым не вінаватую краіну», цытуе Deutsche Welle інтэрвію Анналены Бэрбак тэлеканалу ZDF.
Масква нават ня хоча «сапраўды актыўна весьці перамовы аб гуманітарных калідорах», і ў такой сытуацыі не застаецца іншага шляху, акрамя як працягваць «падтрымліваць Украіну пастаўкамі зброі», падкрэсьліла кіраўніца нямецкага МЗС, нагадаўшы пра абвешчаныя Бэрлінам у пачатку гэтага тыдня дадатковыя пастаўкі нямецкага ўзбраеньня на суму больш як 500 млн эўра.
Пастаўкі зброі зь Нямеччыны ва Ўкраіну, паводле Бэрбак, ідуць «па тонкай грані» з прычыны «абсалютнага дэфіцыту ўласных запасаў» Нямеччыны. Яна прызнала, што ў пачатку вайны нямецкі ўрад быў нерашучым у пытаньні перадачы ўзбраеньняў, але цяпер неабходны хуткія дадатковыя пастаўкі ўвосень, «каб украінцы змаглі абараняцца».
Нямеччына плянуе дадаткова перадаць Кіеву ракетныя сыстэмы Iris-T, 10 браняваных рамонтна-эвакуацыйных машын, 20 ракетных установак, боепрыпасы і сродкі абароны ад дронаў. Пастаўкі павінен ухваліць камітэт Бундэстагу. Плянуецца, што нямецкая зброя будзе перададзеная Ўкраіне ў 2023 годзе.
