Вайсковыя экспэрты сьцьвярджаюць, што Расея пачала мінаваць населеныя пункты на ўсходняй лініі фронту ў Запароскай вобласьці, рыхтуючыся да абароны сваіх пазыцый.
У Мікалаеве — часовая перадышка ад абстрэлаў, пад ударам Запарожжа
Улады Мікалаева выкарыстоўваюць першыя гадзіны без расейскіх абстрэлаў для аднаўленьня пашкоджанай інфраструктуры.
Паводле мэра горада Аляксандра Сянкевіча, у Мікалаеве застаецца каля 200 тысяч жыхароў. Пасьля вызваленьня ад расейскай акупацыі некалькіх населеных пунктаў у Херсонскай вобласьці, зьявіліся лягістычныя магчымасьці праводзіць эвакуацыю грамадзян у Днепрапятроўскую і Адэскую вобласьці, а таксама ў іншыя рэгіёны Ўкраіны. Гарадзкія ўлады рыхтуюцца да пачатку новага навучальнага году, але, улічваючы сталую небясьпеку, навучаньне будзе адбывацца ў дыстанцыйным рэжыме.
У ноч на 18 жніўня расейцы абстралялі адзін раён у горадзе Запарожжа і яшчэ пяць населеных пунктаў у яго навакольлі. Ракеты пацэлілі ў аб’екты інфраструктуры.
Расейскія штурмы ў Данецкай і Харкаўскай абласьцях пакуль беспасьпяховыя
Амэрыканскі Інстытут вывучэньня вайны (ISW) у сваёй справаздачы адзначае, што расейскія войскі дасягнулі абмежаваных посьпехаў на паўночны захад ад Данецка і каля адміністрацыйнай мяжы Запарожжа і Данецкай вобласьці.
У той жа час некалькі штурмаў расейцаў у раёне мяжы Харкава і Данецкай вобласьці ў тактычна складаных лясных раёнах аказаліся беспасьпяховымі.
Экспэрты Інстытуту мяркуюць, што расейскія падразьдзяленьні рыхтуюцца да абароны сваіх наземных ліній сувязі (GLOCs) у трохкутніку Мелітопаль—Такмак—Бярдзянск (запароская вобласьць) і мінуюць населеныя пункты на ўсходзе Запароскай вобласьці.
У Харкаве павялічылася колькасьць ахвяр начных абстрэлаў
У ноч на 18 жніўня ў Харкаве ад абстрэлаў пацярпелі Салтаўскі і Слабадзкі раён горада, дзе пашкоджаныя жылыя будынкі, трамвайнае дэпо і інтэрнат. Пад заваламі ў гэтых двух раёнах загінулі 9 і атрымалі раненьні 35 мясцовых жыхароў, у тым ліку двое дзяцей.
Міністэрства абароны Расеі паведаміла, што «высокадакладная зброя наземнага базаваньня пацэліла ў пункт часовага базаваньня замежных наймітаў у Харкаве». Паводле Расеі, там «зьнішчана 90 баевікоў».
Пасьля выбухаў у Крыме Расея ратуе свой паветраны флёт
Галоўнае ўпраўленьне выведкі Міністэрства абароны Ўкраіны паведаміла, што Расея пачала тэрмінова перамяшчаць свае самалёты і верталёты ў глыб тэрыторыі Крыму пасьля выбухаў на аэрадроме «Сакі» і ў Гвардзейскім, а таксама на складзе з боепрыпасамі каля Джанкою.
Паводле ўкраінскіх выведнікаў, авіяцыйная тэхніка перамяшчаецца на запасныя аэрадромы і і аэрадромы сталага базаваньня на тэрыторыі Расеі.
У прыватнасьці, украінская выведка сьцьвярджае, што з Крыму перамясьцілі ня менш, чым 24 самалёты і 14 верталётаў.
Перамовы аб абмене палоннымі і целамі загінулых трываюць
Украіна працягвае перамовы аб вяртаньні целаў загінулых у баях абаронцаў краіны, а таксама палонных. Пры пасярэдніцтве Чырвонага Крыжа нядаўна вярнулі яшчэ 19 цел. Сярод іх пакуль няма целаў загінулых беларусаў.
Ва ўкраінскай выведцы сьцьвярджаюць, што Расея не зацікаўленая ў абмене палоннымі, якія былі мабілізаваныя ў так званых «ЛНДР». «Да іх сапраўды невысокі інтарэс. Мы гэта бачым на розных узроўнях стаўленьня: ад таго, што яны найгорш апранутыя і з найгоршай зброяй, да, у тым ліку, у пытаньні абмену», — сказаў прадстаўнік Галоўнага ўпраўленьня выведкі Мінабароны Ўкраіны Андрэй Юсаў у эфіры ўсеўкраінскага тэлемаратону #UAРазом.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
