Таксама пратэстоўцы прарваліся праз мэталічныя вароты ў Міністэрства фінансаў краіныі офіс прэзыдэнта, паведамляе Reuters.
У пратэстах удзельнічаюць дзясяткі тысяч чалавек, у тым ліку якія прыехалі ў горад зь іншых рэгіёнаў. Прадстаўнікі ўладаў заявілі AFP, што частка ўдзельнікаў была «зьвезеная» ў горад. У Калёмба ўвечары 8 ліпеня абвясьцілі камэнданцкую гадзіну, яна не выконваецца.
Сама меней 39 чалавек, у тым ліку двое паліцыянтаў, атрымалі раненьні і былі шпіталізаваныя падчас пратэстаў, паведамілі Reuters у шпіталях.
Прэм'ер-міністар Раніл Вікрамасінгхе склікаў экстраную нараду лідэраў палітычных партый Шры-Лянкі для абмеркаваньня крызісу. Лідэры палітычных партый Шры-Лянкі падчас нарады вырашылі, што прэзыдэнт краіны Гатабая Раджапакса павінен пайсьці ў адстаўку, паведамляе Newswire.
Былы амбасадар Шры-Лянкі ў Расеі Удаянга Віратунга, які знаходзіцца ў Калёмба, заявіў ТАСС, што прэзыдэнт, верагодна, ужо пакінуў краіну на самалёце. Аб гэтым жа паведамляюць некаторыя мясцовыя СМІ, але афіцыйна гэтая інфармацыя пакуль не пацьверджаная.
Прэм'ер Шры-Лянкі заявіў пра гатоўнасьць сысьці ў адстаўку пасьля фармаваньня новага ўраду краіны, піша Reuters са спасылкай на заяву ягонага офісу.
Пратэсты на Шры-Лянцы працягваюцца з пачатку 2022 году. Падчас пратэстаў ужо восем чалавек загінулі, больш за 200 пацярпелі.
Эканоміка краіны перажывае найбуйнейшы крызіс у сучаснай гісторыі. У гарадах адзначаецца дэфіцыт паліва, лекаў, некаторых прадуктаў, валютныя рэзэрвы цалкам вычарпаныя. Улады абвінавачваюць у гэтым пандэмію каранавіруснай інфэкцыі, якая прывяла да зьніжэньня турызму, а ён зьяўляўся асноўнай крыніцай валютных паступленьняў.
Краіна дапусьціла дэфолт па 51-мільярдным зьнешнім доўгу і вядзе перамовы аб яго рэструктурызацыі. Прэзыдэнт Шры-Лянкі Гатабая Раджапакса 6 ліпеня паведаміў, што правёў тэлефонныя перамовы з прэзыдэнтам Расеі Ўладзімірам Пуціным і папрасіў у яго крэдытнай падтрымкі і аднаўленьня палётаў «Аэрафлота» ў краіну.
