У дакладзе гаворыцца, што пасьля таго, як розныя эўрапейскія краіны пачалі выкрываць і высылаць расейскіх выведнікаў, расейскія сакрэтныя службы, відаць, прынялі рашэньне перабазаваць іх у Швайцарыю — нэўтральную краіну, якая не ўваходзіць у Эўразьвяз.
Адносіны паміж Швайцарыяй і Расеяй пагоршыліся пасьля расейскага ваеннага ўварваньня ва Ўкраіну. Швайцарыя далучылася да большасьці санкцый, якія Эўразьвяз увёў у дачыненьні да Масквы. Прэзыдэнт Швайцарыі Іньяцыё Касіс тады заявіў, што Швайцарыя не перастае быць цэнтрам эўрапейскай дыпляматыі, але абавязаная паказаць, якія каштоўнасьці яна падтрымлівае і якія палітычныя межы лічыць неабходным правесьці.
Кіраўнік выведнага ведамства Крыстыян Д’юсэ, які ў 2000-х гадах працаваў палітычным дарадцам амбасады Швайцарыі ў Маскве, а пасьля — дыпляматычным дарадцам прэзыдэнта Швайцарыі, у інтэрвію газэце Tages-Anzeiger таксама пацьвердзіў: «Жэнэва застаецца цэнтрам шпіёнскай актыўнасьці. Нам вядома, што тут дзейнічаюць дзясяткі агентаў, якія займаюць пасады ў расейскіх дыпляматычных і консульскіх місіях».
- Пасьля пачатку вайны Расеі супраць Украіны з краін Эўразьвязу, ЗША і Японіі павысылалі каля 200 расейскіх дыпляматаў.
