12 красавіка Служба бясьпекі Ўкраіны (СБУ) апублікавала ўрывак зь перахопленай тэлефоннай размовы расейскага вайскоўца з жонкай, у якой яна сьмяялася і заклікала мужа «гвалціць украінак».
Журналісты праграмы «Схемы» разам з расейскай рэдакцыяй Радыё Свабода ідэнтыфікавалі ўдзельнікаў размовы. Мужчына, былы прызыўнік Расгвардыі, раней служыў у палку, які ўдзельнічаў у акупацыі Крыму Расеяй. З пачаткам поўнамаштабнага наступу на Ўкраіну апынуўся ў Херсонскай вобласьці.
Фрагмэнт перахопленай размовы:
— Ты давай там гвалтуй украінскіх баб. Толькі мне нічога не кажы. Зразумеў? Каб я нічога ня ведала, — кажа жанчына мужу.
— Гвалтаваць і нічога табе не казаць? — адказвае муж.
— Так, каб я нічога ня ведала. А што? (сьмяецца. — РС).
— Можна, праўда?
— Так, дазваляю. Толькі засьцерагайся!
— Добра.
Як удалося высьветліць журналістам, расейскі вайсковец, якому ўласная жонка «дазволіла» гвалтаваць «украінак», на момант званка знаходзіўся ў Херсонскай вобласьці. Ад крыніц ва ўкраінскіх праваахоўных органах журналісты даведаліся расейскія тэлефоны суразмоўцаў. Гэтыя два нумары выкарыстоўваліся пры рэгістрацыі двух акаўнтаў у сацыяльнай сетцы «ЎКантакце».
Атрыманыя нумары дазволілі ідэнтыфікаваць суразмоўцаў. Гэта 27-гадовы Раман Быкоўскі і яго жонка — Вольга Быкоўская, у дзявоцтве — Пінясава. Абое з Арлоўскай вобласьці Расейскай Фэдэрацыі. У іх шмат супольных фота.
Жыцьцёвае крэда Вольгі Быкоўскай, мяркуючы па профілі «ЎКантакце»: «Навучыцца нікому нічога не расказваць. Тады ўсё будзе добра». Там жа жанчына, якая параіла мужу «гвалціць жанчын», адзначыла, што самае галоўнае ў яе жыцьці — «сям’я і дзеці».
У яе ёсьць сын — у 2017 годзе яна стала маці, пра што і абвясьціла публічна.
Хаця ў самога Рамана Быкоўскага закрытая старонка, але яго можна сустрэць на фатаздымках калегаў. Журналісты Радыё Свабода знайшлі яго «ў сябрах» з расейцам Аляксеем Забрусавым, ураджэнцам Пензенскай вобласьці, зь якім Раман, паводле фота, апублікаваных Забрусавым, служыў у 2016 годзе.
На іх уніформах добра відаць сымболіка, таму можна зрабіць выснову, што Раман Быкоўскі служыў у Нацыянальнай гвардыі Расеі прынамсі ў 2016 годзе.
Выява на шаўронах паказвае, што гэта дывізія спэцыяльных апэрацый імя Ф. Э. Дзяржынскага. Дывізія лічыцца элітнай вайсковай часткай Нацыянальнай гвардыі Расеі.
Адзін з фотаздымкаў у «Аднаклясьніках» маці мужчыны Ірыны Быкоўскай апублікавана 10 лютага 2018 году. На рукаве добра бачны шаўрон – расьсьледвальнікі групы Conflict Intelligence Team высьветлілі, што Быкоўскі ў той час служыў у дысьлякаваным у Наварасійску 108-м гвардзейскім дэсантна-штурмавым палку, які ўваходзіць у склад 7-й гвардзейскай дэсантна-штурмавой дывізіі. Ён заключыў кантракт зь міністэрствам абароны не пазьней за люты 2018 году.
Аб удзеле дэсантнікаў 108-га дэсантна-штурмавага палка ў вайне з Украінай раней не паведамлялася, затое добра вядомая роля гэтага падразьдзяленьня ў анэксіі Крыма: вайскоўцы 108-га ДШП актыўна фатаграфаваліся на паўвостраве вясной 2014 году і выкладвалі гэтыя здымкі ў сацсеткі. Удзельнічаў полк і ў сырыйскай кампаніі. Ці Служыць Быкоўскі там цяпер, невядома, гаворыцца ў матэрыяле.
Аб'явы на «Авіто», якія Раман Быкоўскі разьмяшчаў у 2018 годзе, дазваляюць зрабіць выснову, што яны з жонкай і сынам перабраліся ў анэксаваны Расеяй Крым.
Радыё Свабода патэлефанавала Раману Быкоўскаму. Ён пацьвердзіў, што гэта ягонае імя і прозьвішча, а на пытаньне, ці застаецца ён у Херсонскай вобласьці, адказаў адмоўна і сказаў, што знаходзіцца ў Севастопалі. Спытаўшы, хто яму тэлефануе, і даведаўшыся, што гэта журналіст, Быкоўскі сказаў, што голас на апублікаванай СБУ праслушцы яму не належыць. Запіс размовы, зроблены Радыё Свабода, паказвае ідэнтычнасьць ягонага голасу таму, які гучыць у размове пра «ўкраінскіх баб».
Журналісты датэлефанаваліся і да Вольгі Быкоўскай. Голас жанчыны таксама цалкам супадае з голасам на апублікаваным украінскімі спэцслужбамі аўдыёзапісе. Вольга Быкоўская пацьвердзіла Радыё Свабода, што ейны муж цяпер у Севастопалі, удакладніўшы, што ён лечыцца ў шпіталі пасьля раненьня. Па словах Вольгі, дзе менавіта быў паранены Раман Быкоўскі, яна ня ведае. Пасьля гэтага адказу Вольга Быкоўская спыніла размову і стала скідаць далейшыя званкі. На паведамленьні журналістаў у сацыяльных сетках ні Раман Быкоўскі, ні ягоная жонка не адказалі.
Цалкам журналісцкае расьсьледаваньне чытаць тут.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
