Украінцы выступаюць на Паралімпіядзе, беларусы і расейцы — не
Украінскія спартоўцы ў першы дзень спаборніцтваў на Паралімпіядзе, якая праходзіць у Кітаі, заваявалі сем мэдалёў, у тым ліку тры залатыя.
3 сакавіка стала вядома, што Міжнародны паралімпійскі камітэт адхіліў зборныя Беларусі і Расеі ад удзелу ў спаборніцтвах.
Расейскія самалёты ня будуць лятаць за мяжу
Агенцтва «Росавиация» рэкамэндавала расейскім авіякампаніям, якія маюць у лізінгу самалёты ад замежных кампаніяў, з 6 сакавіка спыніць палёты за мяжу. Рэкамэндацыя стасуецца перавозкі і пасажыраў, і грузаў.
Паводле Блінкена, адзін з мэтадаў вядзеньня вайны Расеяй — бязьлітаснасьць да мірнага насельніцтва
Дзяржаўны сакратар ЗША Энтані Блінкен перакананы, што Ўкраіна можа выйграць вайну з Расеяй. Пра гэта ён сказаў у інтэрвію ВВС.
Украінскія СМІ паведамляюць пра гібель перамоўніка са складу ўкраінскай дэлегацыі
СБУ не пацьвярджае і не абвяргае.
Адразу некалькі ўкраінскіх інтэрнэт-выданьняў паведамілі аб гібелі удзельніка ўкраінскай дэлегацыі на перамовах з Расеяй Дзяніса Кірэева пры спробе ягонага затрыманьня Службай бясьпекі Ўкраіны паводле падазрэньня ў дзяржаўнай здрадзе.
Сайт «Украінская праўда» паведамляе, што Кірэева застрэлілі ў часе затрыманьня. Нібыта ёсьць шмат запісаў тэлефонных перамоваў, якія сьведчылі пра ягоную здраду.
У Кіеве паведамілі аб затрыманьні пілёта зьбітага расейскага Су-25
Адбылося гэта ў Чарнігаўскай вобласьці, каля вёскі Забароўка. Паводле Генэральнага штабу Ўзброеных сілаў Украіны, за час уварваньня Расеі ўкраінская супрацьпаветраная абарона зьнішчыла мінімум 39 расейскіх самалётаў і 40 гелікоптэраў.
У камандаваньні Паветраных сілаў напярэдадні паведамілі, што да поўнамаштабнага ўварваньня ва Ўкраіну авіяцыйная групоўка расейскай арміі, засяроджаная вакол украінскіх межаў, налічвала больш за сямсот адзінак авіяцыйнай тэхнікі: 450 самалётаў, 250 гелікоптэраў. Расейскі бок гэтыя лічбы пакуль не камэнтаваў.
Эўра ў Менску прадаюць ужо за 3,9 – 4 BYN, даляр – за 3,5 – 3,6 BYN
У абменьніках Менску стаяць чэргі, піша «Наша Ніва». Паводле зьвестак парталу Myfin.by, эўра ў Менску прадаюць ужо за 3,9–4 BYN, даляр — за 3,5–3,6 BYN.
Беларускі рубель за 10 дзён вайны Расеі супраць Украіны пры саўдзеле ўладаў Беларусі абваліўся на 40%.
Міністэрства абароны Ўкраіны: на Мікалаеўшчыне зьбілі чатыры расейскія верталёты
Марскія пяхотнікі зьбілі чатыры гелікоптэры расейскай арміі, паведаміла прэс-служба 35-й асобнай брыгады марской пяхоты.
«Нашы марскія пяхотнікі разам з пабрацімамі з апэратыўнага камандаваньня „Поўдзень“ зьбілі чатыры гелікоптэры ворага. Пры гэтым адзін з марпехаў сарваў джэк-пот, ён зьнішчыў адразу тры адзінкі», — гаворыцца ў паведамленьні.
У Кіеве ўмацоўваюць абарону
Расейскія войскі надалей пагражаюць сталіцы Ўкраіны. Над Кіевам дзейнічаюць сілы супрацьпаветранай абароны Ўкраіны, а ў бліжэйшым навакольлі сталіцы ідзе барацьба з дывэрсійнымі расейскімі групамі.
У прыгарадзе сталіцы Ірпені расейцы падарвалі чыгунку, у выніку чаго ўлады мусілі мяняць маршрут эвакуацыі мясцовых жыхароў у Кіеў.
Да абароны Кіева, як паведамляюць гарадзкія ўлады, далучыліся два чачэнскія падразьдзелы.
Сёньня раніцай гарадзкія ўлады абнавілі на мачце вялікі дзяржаўны ўкраінскі сьцяг. Мэр Кіева Віталь Клічко заявіў, што ўся крытычная інфраструктура гораду функцыянуе, а мэтро працуе абмежавана, пераважна як сховішча для грамадзян.
У часе наведваньня лякарняў адна з галоўных лекарак паведаміла мэру, што мэдыкі працуюць і жывуць у лякарнях. Усімі неабходнымі мэдыкамэнтамі забясьпечаныя.
Дарадца офісу прэзыдэнта Аляксей Арастовіч заявіў, што расейскія войскі цяпер канцэнтруюць свае дзеяньні на тым, каб забясьпечыць сябе: «Украінскія войскі кантралююць сытуацыю, наносяць контрудары».
З Валнавахі і навакольных паселішчаў удалося эвакуаваць 400 чалавек
Пра гэта паведаміў кіраўнік Данецкай абласной вайсковай адміністрацыі Павал Кірыленка.
«Гэта тыя, хто самастойна змог напярэдадні дабрацца да населенага пункту, каля якога спынілася калёна эвакуацыйнага транспарту. Хоць сёньня мы мелі намер і неабходны транспарт для эвакуацыі значна большай колькасьці людзей, рух калёны змушаныя былі спыніць, бо расейцы зноў пачалі бязьлітасны абстрэл Валнавахі — прасоўвацца туды было вельмі небясьпечна», — напісаў ён на сваёй старонцы ў фэйсбуку.
Кірыленка паведаміў, што, нягледзячы на дамоўленасьці з Расеяй пры пасярэдніцтве Чырвонага Крыжа, расейскі бок працягвае абстрэлы, і таму эвакуацыю насельніцтва з Марыюпалю таксама вырашылі перанесьці.
Консул Рэспублікі Беларусі ў Мюнхэне звольнілася ў знак пратэсту супраць удзелу Беларусі ў вайне ва Ўкраіне
Пра заяву аб звальненьні Натальлі Хваставой гаворыцца ў службовай запісцы консула Генэральнага консульства Рэспублікі Беларусі ў Мюнхэне.
Пуцін: Расея будзе разглядаць спробы іншых краін устанавіць беспалётную зону над Украінай як удзел у ваенных дзеяньнях
Аб гэтым Уладзімір Пуцін заявіў 5 сакавіка падчас сустрэчы з супрацоўніцамі кампаніі «Аэрофлот».
«Цяпер мы чуем, што трэба зрабіць беспалётную зону над тэрыторыяй Украіны, — заявіў Пуцін. — Зрабіць гэта можна толькі з тэрыторыі суседніх дзяржаваў. Але ўсякі рух у гэтым кірунку будзе намі разглядацца як удзел ва ўзброеным канфлікце той краіны, з боку якой будуць стварацца пагрозы для нашых вайскоўцаў. Мы ў гэтую ж сэкунду будзем рэагаваць».
Ва Ўкраіне стварылі адмысловы сайт для іншаземцаў, якія хочуць далучыцца да абароны краіны ад Расеі
На сайце Fight for Ukraine апісаная працэдура, паводле якой іншаземцы могуць далучыцца да абароны Ўкраіны ад расейскіх войскаў.
Для гэтага яны могуць зьвярнуцца ў амбасады Ўкраіны на тэрыторыі дзяржаваў свайго грамадзянства.
Беларусы ўжо далучыліся да батальёнаў тэрытарыяльнай абароны ў Кіеве, Бучы і Львове.
Украінскія распрацоўнікі ўклалі інтэрактыўную мапу з абстралянымі цывільнымі аб’ектамі
Яна напаўняецца зьвесткамі з розных крыніц, у тым ліку зь Вярхоўнай Рады Украіны. Большасьць пацярпелых цывільных аб’ектаў у Кіеўскай, Харкаўскай і Чарнігаўскай абласьцях.
Лідэр гурту «Океан Ельзи» Вакарчук: Беларусы, ня бойцеся, змагайцеся, мы дапаможам вам
У эфіры Свабоды Premium легендарны ўкраінскі музыка, вакаліст і лідэр гурту «Океан Ельзи», грамадзкі дзяяч Сьвятаслаў Вакарчук заклікаў беларускіх вайскоўцаў ня ўдзельнічаць у вайне Расеі супраць Украіны, а беларускі народ — «перайсьці Рубікон» і змагацца за вольную незалежную Беларусь.
— Калі вас выйдзе мільён, улада ня зможа ўсіх забраць у турму. Пагатоў цяпер расейскія салдаты занятыя вайной ва Ўкраіне, і яны дакладна ня будуць займацца яшчэ і пратэстамі ў Беларусі.
Сьвятлана Ціханоўская падтрымала заклік прэзыдэнта Ўкраіны Ўладзіміра Зяленскага аб закрыцьці неба над Украінай
«Гэта пытаньне бясьпекі Ўкраіны, Беларусі і ўсёй Эўропы. Гэта таксама дапаможа спыніць расейскія ракеты і вайсковыя самалёты, якія запускаюць з тэрыторыі Беларусі кожны дзень», — сказала Сьвятлана Ціханоўская ў звароце да ўкраінцаў.
Расею і Беларусь выключылі з удзелу ў Міжнародным саюзе чыгунак
2 сакавіка Міністэрства інфраструктуры Ўкраіны разаслала афіцыйныя лісты 11 найбуйнейшым і найбольш ўплывовым арганізацыям сьвету ў сфэры паветранага, марскога, чыгуначнага транспарту, а таксама будаўніцтва і турызму.
Сёньня атрыманы афіцыйны адказ Міжнароднага саюза чыгунак (UIC) аб прыпыненьні ўдзелу Расейскіх чыгунак і Беларускай чыгункі ў арганізацыі — да аднаўленьня мірнай сытуацыі ва Ўкраіне. У UIC заявілі, што сочаць за сытуацыяй і выказалі салідарнасьць з Украінскімі чыгункамі ў цяжкія часы.
- Міжнародны саюз чыгунак (Union internationale des chemins de fer) — сусьветнае аб’яднаньне гандлёва-эканамічнага супрацоўніцтва паміж асноўнымі субʼектамі міжнароднай чыгуначнай галіны. Ён быў заснаваны ў 1922 годзе са штаб-кватэрай у Парыжы і налічвае 204 чальцоў UIC.
СБУ: у Івана-Франкоўскай вобласьці затрымалі арганізатараў сеткі па стварэньні «Фэдэратыўнай рэспублікі Украіна»
Паводле інфармацыі ведамства, у склад «фэдэратыўнай рэспублікі Украіна» павінны былі ўвайсьці Івана-Франкоўская, Закарпацкая, Львоўская, Цярнопальская, Чарнавіцкая вобласьці.
Ад коміка да лідэра нацыі. Гісторыя Ўладзіміра Зяленскага. ВІДЭА
Уладзімеру Зяленскаму выпала кіраваць Украінай падчас расейскага нападу. У 2019 годзе Зяленскі без палітычнага досьведу стаў прэзыдэнтам Украіны. Падчас вайны ва Ўкраіне падтрымка Зяленскага вырасла да 91%. Які шлях прайшоў Уладзімер Зяленскі ад гульца ў Клюбе вясёлых і дасьціпных да лідэра нацыі.
Жыхары горада Ірпень пад Кіевам пакідаюць горад праз разбураны мост
Першапачаткова мірных жыхароў павінны былі эвакуіяваць цягніком, але раніцай 5 сакавіка мэр горада паведаміў, што чыгуначныя шляхі падарвалі расейскія вайскоўцы, якія бамбуюць горад ужо некалькі дзён. Эвакуацыю давялося праводзіць аўтобусамі, для гэтага жыхарам горада трэба было перайсьці мост, узарваны раней, каб ня даць расейскім войскам зайсьці ў горад.
Літоўскія СМІ: Зь Беларусі ў Літву выяжджаюць поўныя аўтобусы. Большасьць пасажыраў — мужчыны
На КПП Мядзінінкай апошнім часам павялічылася колькасьць ахвочых пакінуць Беларусь. За дзень тут прапусьцілі каля 200 чалавек.«У апошнія дні назіраецца павелічэньне прыкладна на 30 працэнтаў», — сказаў начальнік аддзела памежнага кантролю Віленскай памежнай службы Гедрус Маткявічус.
Большасьць з тых, хто прыбывае зь Беларусі, — мужчыны, паведамляюць літоўскія СМІ.