Украінскі суд прызнаў гэта дробным хуліганствам і абмежаваўся вуснай заўвагай.
Стрыйскае раённае ўпраўленьне Нацыянальнай паліцыі ў Львоўскай вобласьці зьвярнулася ў суд з пазовам супраць грамадзяніна Беларусі, які 2 лютага зьняў дзяржаўны сьцяг Украіны з дому культуры «Цэмэнтнік» у горадзе Мікалаеў (Стрыйскі раён, Львоўская вобласьць).
Гэта адбылося ўдзень 2 лютага, прыкладна а 15 гадзіне. На беларуса склалі пратакол аб адміністратыўным правапарушэньні паводле артыкула 173 — дробнае хуліганства, за якое суд можа пакараць штрафам, грамадзкімі работамі на 40–60 гадзін, выхаваўчымі работамі на тэрмін ад аднаго да двух месяцаў з адлічэньнем 20% заробку, або адміністратыўным арыштам на тэрмін да 15 сутак.
На судовым пасяджэньні беларус прызнаў сваю віну і прасіў суд строга яго не караць. У той жа час у судовым рашэньні не ўдакладняецца, як ён патлумачыў свой учынак і чым яго матываваў.
Абвяшчаючы рашэньне аб закрыцьці справы супраць беларуса і вынясеньні яму вуснай заўвагі, суд спаслаўся на норму Кодэксу Ўкраіны аб адміністрацыйных парушэньнях, згодна зь якой можна зрабіць гэта і вызваліць ад адказнасьці.
У Мікалаеве Стрыйскага раёну Львоўскай вобласьці пражывае больш як 14 тысяч чалавек. Мясцовы дом культуры — культурна-забаўляльны цэнтар для моладзі. У ім арганізоўваюць канцэрты, кірмашы, урачыстыя цырымоніі выпуску школьнікаў. Там працуюць некалькі гурткоў, творчыя студыі, цэнтар вывучэньня замежных моў.
