Сьцісла:
- Ніколі раней Беларусь і Расея не праводзілі настолькі буйных вайсковых манэўраў на тэрыторыі незалежнай Беларусі.
- Вучэньням спадарожнічае непразрыстасьць. Беларускі і расейскі бакі ўсяляк хаваюць важныя акалічнасьці, зьвязаныя зь імі.
- Надзвычайнай закрытасьцю Расея імкнецца напужаць Захад і прымусіць яго саступіць.
- Расейская вайсковая прысутнасьць у Беларусі ўзмацняецца, становіцца пастаяннай.
Першае, што зьвяртае на сябе ўвагу — гэта маштаб вучэньняў. Ніколі раней Беларусь і Расея не праводзілі настолькі буйных вайсковых манэўраў на тэрыторыі незалежнай Беларусі. Іхная працягласьць — 10 дзён — удвая большая, чым звычайна (калі параўноўваць, напрыклад, зь леташнімі «Захад- 2021»).
Паводле незалежных назіральнікаў, у вучэньнях з расейскага боку задзейнічалі самыя сучасныя віды ўзбраеньняў, напрыклад ракетныя комплексы «Искандер-М». Таксама ў іх бяруць удзел дэсантнікі, марская пяхота, артылерыя.
Адрозьніваецца і тэрыторыя правядзеньня вучэньняў. Калі раней яны ладзіліся амаль выключна ў Берасьцейскай і Горадзенскай абласьцях, то цяпер праходзяць фактычна на большай частцы краіны.
Другі важны момант — гэта непразрыстасьць у правядзеньні гэтых вучэньняў. Беларускі і расейскі бакі ўсяляк хаваюць усе акалічнасьці, зьвязаныя зь імі.
У прыватнасьці, загадкай зьяўляецца колькасьць расейскіх войскаў, якія прыбылі на тэрыторыю Беларусі. Была толькі заява, што яна не перавысіць абмежаваньні, прадугледжаныя Венскім дакумэнтам 2011 году. То бок 13 тысяч чалавек.
Аднак, паводле інфармацыі экспэртаў і выведкі заходніх краін, іх колькасьць значна перавышае згаданую лічбу. Напрыклад, генэральны сакратар NATO Енс Столтэнбэрг заявіў, што паводле ягоных зьвестак, Расея перамясьціла на тэрыторыю Беларусі каля 30 тысяч сваіх вайскоўцаў.
Надзвычайная закрытасьць, штучнае стварэньне таямніцы падаграваюць падазрэньні адносна сапраўдных намераў арганізатараў вучэньняў. Бо невядомае пужае. У гэтым і ёсьць галоўная задума кіраўніцтва Расеі. Яно хоча такім чынам напалохаць Захад і прымусіць яго да саступак.
Яшчэ адно важнае адрозьненьне гэтых вучэньняў ад папярэдніх — канцэнтрацыя расейскіх войскаў на мяжы з Украінай. Вучэньні пройдуць у Лельчыцкім, Ельскім, Нараўлянскім, верагодна, у Лоеўскім раёнах Гомельскай вобласьці. На тле таго, што расейцы падвялі вялікую колькасьць войскаў да мяжы з Украінай на сваёй тэрыторыі, гэта выглядае даволі злавесна.
Шмат хто назваў гэтыя дзеяньні Расеі акупацыяй Беларусі. Ідзе дыскусія, ці вернуцца расейскія войскі назад. Лукашэнка і Крэмль вуснамі прэсавага сакратара Пуціна Дзьмітрыя Пяскова запэўніваюць, што пасьля вучэньняў вайсковыя падразьдзяленьні РФ будуць выведзены зь Беларусі. Думаю, што так і будзе.
Але вось міністар абароны Расеі Сяргей Шайгу, які на мінулым тыдні наведаў Менск, адзначыў, што на сёлета заплянавана больш за 20 сумесных мерапрыемстваў. Значыць, гэта не апошнія вучэньні, будуць яшчэ, мо толькі меншых маштабаў. Гэта значыць, расейская вайсковая прысутнасьць у Беларусі ўзмацняецца, становіцца пастаяннай. Адныя войскі выводзяцца, прыбываюць новыя, і так бесьперапынна.
Самае галоўнае палягае ў тым, што Беларусь намаганьнямі свайго кіраўніцтва ўцягваецца ў чужую мілітарысцкую гульню, якая відавочна супярэчыць міралюбівым настроям большасьці беларусаў.
Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
