Гаворка ідзе аб унёску за мінулы год.
«Армэнія ўстрымліваецца ад падпісаньня рашэньня „Аб бюджэце АДКБ на 2024 год“ і, адпаведна, ад удзелу ў фінансаваньні дзейнасьці арганізацыі», — заявілі ў ведамстве.
МЗС зазначыў, што згодна з унутранымі правіламі АДКБ дэталі бюджэту арганізацыі не падлягаюць публічнаму абвяшчэньню.
МЗС Расеі раней заявіла, што, калі Армэнія не пагасіць запазычанасьці перад АДКБ да канца 2025 году, то могуць наступіць розныя захады. Пры гэтым наўрад ці дойдзе да выключэньня Армэніі з АДКБ.
На мінулым тыдні армянскі парлямэнт прагаласаваў за пачатак уступленьня краіны ў Эўразьвяз. Брусэль пакуль не прапаноўваў Армэніі сяброўства ў арганізацыі, але афіцыйны Ерэван спадзяецца, што неўзабаве зьявіцца магчымасьць пачаць першыя перамовы пра гэта.
- У АДКБ уваходзяць Беларусь, Казахстан, Кіргізстан, Расея, Таджыкістан і Армэнія.
- У пачатку 2024 году прэм’ер-міністар Армэніі Нікол Пашыньян аб’явіў аб замарожваньні сяброўства Армэніі ў АДКБ і дапусьціў магчымасьць выхаду краіны з арганізацыі, калі яна ня выканае сваіх абавязаньняў і не прызнае зоны адказнасьці. Ішлося аб ваеннай апэрацыі Азэрбайджану ў Нагорным Карабаху ў верасьні 2023 году. Пазьней Пашыньян назваў АДКБ «пагрозай нацыянальнай бясьпецы Армэніі», нягледзячы на запэўніваньні арганізацыі аб захаваньні абавязаньняў перад Ерэванам.
- Нагорны Карабах (па-армянску Арцах), згодна зь міжнародным правам, належыць Азэрбайджану, але з пачатку 1990-х гадоў Баку не кантраляваў яго тэрыторыю. У 2020 годзе ў выніку баявых дзеяньняў азэрбайджанскае войска вярнула пад свой кантроль значную частку тэрыторыяў.
- У 2023 годзе Азэрбайджан правёў у Карабаху кароткатэрміновую ваенную апэрацыю, у выніку якой цалкам усталяваў кантроль над рэгіёнам, а непрызнаная Нагорна-Карабаская рэспубліка, у якой жыло пераважна армянскае насельніцтва, спыніла існаваньне і заявіла пра роспуск.
- Каля 120 тысяч чалавек вымушана пакінулі свае дамы, баючыся перасьледу з боку ўладаў Азэрбайджану. Баку пры гэтым заклікаў мясцовае насельніцтва прыняць азэрбайджанскае грамадзянства і не пакідаць сваіх дамоў.
Пазыцыя Лукашэнкі
Аляксандар Лукашэнка ў азэрбайджана-армянскім канфлікце выразна заняў праазэрбайджанскую пазыцыю, нягледзячы на тое, што Армэнія лічылася хаўрусьнікам Беларусі ў АДКБ.
Пік напружанасьці прыпаў на 28 кастрычніка 2022 году. Тады Пашыньян казаў пра чаканьні Армэніі ад АДКБ: «Ёсьць дакладныя чаканьні, што, па-першае, АДКБ дасьць пэўную палітычную ацэнку здарэньня і, па-другое, прыме дарожную мапу аднаўленьня тэрытарыяльнай цэласнасьці Армэніі».
На гэта рэзка зрэагаваў Лукашэнка, які, сярод іншага, сказаў: «Вы за што ваюеце ў гэтых гарах 2 тысячы кілямэтраў вышынёй? Загубілі тры сотні чалавек, тры сотні чалавек загінула — там, дзе людзі не жывуць, дзе нават козы ня ходзяць. Чаго вы ваюеце? Сядзьце вы ўдвох, дамоўцеся, і хай Расея асьвяціць гэтую дамову. Але вы ж ня хочаце. Нейкая тут гульня».
Менавіта пасьля таго паседжаньня Рады калектыўнай бясьпекі АДКБ Армэнія пачала паступова замарожваць актыўнасьць у арганізацыі.
Форум