Парлямэнт Малдовы на прапанову ўраду ўвёў рэжым надзвычайнага становішча з прычыны дэфіцыту газу ў краіне. Адпаведная пастанова была ўхваленая галасамі дэпутатаў кіруючай Партыі дзеяньня і салідарнасьці на пазачарговым паседжаньні ў пятніцу, якое трансьлявала прэс-служба заканадаўчага органу.
Падчас надзвычайнага становішча, ад 22 кастрычніка да 20 лістапада, Камісія па надзвычайных сытуацыях «створыць умовы для апэратыўнага закупу адсутных аб’ёмаў прыроднага газу».
Раней паведамлялася, што ўрад Малдовы рыхтуецца абвясьціць надзвычайныя захады ў сувязі з вострым дэфіцытам газу і адсутнасьцю альтэрнатывы расейскаму пастаўшчыку — «Газпрому». Гэты найбуйнейшы газавы манапаліст рэзка скараціў пастаўкі газу ў Малдову адначасова з разрастаньнем крызісных зьяваў у эўрапейскай энэргетыцы.
Прэм’ер-міністар Малдовы Наталія Гаўрыліца заявіла, што ціск у газаправодах краіны ўпаў да крытычнага ўзроўню.
Краіна з насельніцтвам 2,6 мільёна чалавек, разьмешчаная паміж Румыніяй і Ўкраінай, дамагаецца тэрміновай падтрымкі ад пастаўшчыкоў у Эўрапейскім Зьвязе. Тэрмін дзеяньня доўгатэрміновага кантракту з «Газпромам» канчаецца. Расейскі канцэрн запатрабаваў ад Кішынёва аплату, якая ўдвая перавышае ўмовы цяперашняга кантракту.
Цяпер кампаніі «Малдова-Газ» і «Газпром» вядуць перамовы. Тым ня менш прэм’ер-міністар Гаўрыліца папракнула нацыянальную газавую кампанію ў няздольнасьці падтрымліваць ціск у газаправодах краіны.
У Брусэлі вырашылі падтрымаць Малдову. ЭЗ прапануе разгледзець магчымасьць рэвэрсных паставак газу ў Малдову з Румыніі, Славаччыны і Ўкраіны.
Украіна паабяцала дапамагчы
Сакратар Рады нацыянальнай бясьпекі і абароны Ўкраіны Аляксей Данілаў паведаміў, што прэм’ер-міністар Малдовы Наталія Гаўрыліца 22 кастрычніка зьвярнулася зь лістом да ўкраінскага ўраду з просьбай дапамагчы пастаўкамі прыроднага газу.
«Малдова просіць пэўны аб’ём газу, і мы лічым, што мы можам гэтай краіне дапамагчы», — паведаміў Аляксей Данілаў. Паводле яго, Рада нацыянальнай бясьпекі Ўкраіны даручыла Кабінэту Міністраў разгледзець і вырашыць пытаньне аб дапамозе.
Сакратар Рады нацыянальнай бясьпекі ўдакладніў, што газ будзе перададзены Малдове не на камэрцыйных умовах. «Мы паставім газ, але не за грошы, а потым Малдова мусіць вярнуць нам гэты аб’ём газу», — удакладніў ён.
