Лінкі ўнівэрсальнага доступу

Кангрэс дэмакратычных прафсаюзаў Беларусі выступіў супраць разрыву кантракту Yara зь «Беларуськаліем»


Страйк на «Беларуськаліі». Салігорск, жнівень 2020 году
Страйк на «Беларуськаліі». Салігорск, жнівень 2020 году

Беларускі кангрэс дэмакратычных прафсаюзаў (БКДП) выступіў супраць прымусу нарвэскай кампаніі Yara International разарваць кантракт з ААТ «Беларуськалій».

У прынятай 3 сакавіка заяве выканаўчага камітэту БКДП гаворыцца, што БКДП зацікаўлены ў дзейнасьці Yara International на беларускім рынку, бо кампанія — «узор паводзін сацыяльна адказнай кампаніі», і апроч Yara «ніводная з замежных кампаній, якія працуюць у Беларусі, не кіруецца кодэксам этыкі бізнэсу і ня ставіць перад беларускімі партнэрамі ў якасьці безумоўных умоваў, неабходных для далейшага працягу супрацоўніцтва, захаваньне імі правоў чалавека і правоў працоўных».

Паводле БКДП, пазыцыя, занятая кіраўніцтвам Yara на перамовах з адміністрацыямі «Беларуськалію» і Беларускай калійнай кампаніі, ужо «пачынае прыносіць свой плён»: кіраўніцтва «Беларуськалію» «вымушана заявіць пра гатоўнасьць прыняць экспэртаў па бясьпецы працы», працягваюцца «небеспасьпяховыя» перамовы аб аднаўленьні на працы ўдзельнікаў страйку, якія хочуць аднавіцца, таксама адміністрацыя пачала выплаты кампэнсацый страйкоўцам.

У БКДП перакананыя, што «альтэрнатывы прынцыповай пазыцыі Yara International няма», а «шальмаваньне кампаніі, аднясеньне яе да ліку памагатых кіроўнага беларускага рэжыму, ня толькі не адпавядае рэчаіснасьці, але і пераходзіць межы дазволенага». У заяве выканкам БКДП патрабуе спыніць «цкаваньне Yara International, маніпуляцыі грамадзкай думкай, уцягваньне ў кампанію па яе дыскрэдытацыі грамадзян краіны і замежных дыяспар», і выбачаецца перад кіраўніцтвам Yara.

Таксама ў заяве заклікаюць іншыя замежныя кампаніі, якія працуюць у Беларусі, «рушыць усьлед прыкладу Yara International і ўзяць за аснову сваёй прысутнасьці ў Беларусі кодэкс этыкі бізнэсу, зрабіць умовай працягу супрацоўніцтва зь беларускімі партнэрамі захаваньне імі правоў чалавека і правоў працоўных».

  • Больш за 53 тысячы чалавек падпісалі пэтыцыю, у якой заклікалі кіраўніцтва Yara International прыпыніць супрацоўніцтва зь «Беларуськаліем», які, як сьцьвярджаецца ў пэтыцыі, зьяўляецца адной з асноўных крыніц фінансаваньня сілавікоў, адказных за перасьлед дзясяткаў тысяч беларусаў.
  • Раней гендырэктар Yara International Свайн Тур Гульсэтэр і іншыя прадстаўнікі кампаніі заявілі, што падзяляюць пазыцыю нарвэскага ўраду ў падтрымцы дэмакратычнай Беларусі і правоў чалавека.
  • Нарвэжцы двойчы прыяжджалі ў Беларусь і сустракаліся з кіраўніцтвам «Беларуськалію» (18 верасьня і 10 сьнежня 2020 году) з нагоды страйку працоўных і ўмоваў працы на прадпрыемстве.
  • У студзені Сьвятлана Ціханоўская накіравала Гульсэтэру ліст, у якім заклікала кампанію прыпыніць кантракт зь «Беларуськаліем» і дапамагчы работнікам прадпрыемства, якія страйкуюць.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG