Пра гэта паведамляе Бі-Бі-Сі.
Працэс пачаўся ў горадзе Шэньчжэнь на поўдні Кітаю і быў закрыты для замежных журналістаў і дыпляматаў, таму пра яго мала што вядома.
Берагавая ахова Кітаю перахапіла 12 жыхароў Ганконгу ва ўзросьце ад 16 да 33 гадоў у жніўні сёлета, калі яны спрабавалі пакінуць краіну на лодцы і пераправіцца на Тайвань. Прыхільнікі апазыцыі ў Ганконгу зрабілі такую спробу пасьля прыняцьця закону аб нацыянальнай бясьпецы.
Двое з арыштаваных непаўналетнія, таму іх справы будуць разглядацца асобна.
Справу супраць затрыманых крытыкавалі яшчэ да пачатку судовага разбору. ЗША заклікаюць «неадкладна вызваліць» актывістаў.
«Іх так званым злачынствам было пазьбегнуць тыраніі», — заявіў прадстаўнік пасольства ЗША ў Пэкіне.
У адказ МЗС Кітаю запатрабаваў ад Вашынгтону «неадкладна спыніць умяшаньне ва ўнутраныя справы Кітаю ў сувязі з праблемамі Ганконгу».
Восем затрыманых былі абвінавачаныя ў незаконным перасячэньні мяжы, за што прадугледжана да году пазбаўленьня волі. Яшчэ дваіх абвінавачваюць у арганізацыі такога перасячэньня, ім пагражае да сямі гадоў турмы.
Зь мінулага году сотні жыхароў Ганконгу шукаюць прытулку на Тайвані, каб пазьбегнуць ціску на дэмакратычныя пратэсты ў рэгіёне, які да 1990-х гадоў быў брытанскай калёніяй.
Што варта ведаць наконт пратэстаў у Ганконгу
Што такое ўвогуле Ганконг?
Ганконг — спэцыяльная адміністрацыйная адзінка Кітайскай Народнай Рэспублікі, знаходзіцца на поўдні Кітаю, на ўзьбярэжжы Паўднёва-Кітайскага мора. Гэта адзін з асноўных фінансавых цэнтраў Азіі і сьвету.
Ганконг разьмяшчаецца на паўвостраве Каўлун (Цзюлун), а таксама яшчэ на 260 малых астраўках. На поўначы мяжуе са спэцыяльнай эканамічнай зонай Шэньчжэнь у складзе кітайскай правінцыі Гуандун. У Ганконгу жыве больш за 7 мільёнаў чалавек на 1104 км2 — тэрыторыя амаль у 190 разоў меншая, чым Беларусь.
Доўгі час Ганконг належаў Вялікай Брытаніі і перайшоў пад сувэрэнітэт Кітаю ў 1997 годзе. Гораду гарантаваная шырокая аўтаномія ў рамках мадэлі «Адна краіна — дзьве сыстэмы» да 2047 году.
Што выклікала пратэсты?
Улады Ганконгу ўнесьлі ў парлямэнт законапраект аб экстрадыцыі правапарушальнікаў, якія падазраюцца ў крымінальных злачынствах, на мацерыковы Кітай. Экстрадыцыя з Ганконгу цяпер магчымая толькі на падставе дамоваў, якія былі заключаныя яшчэ да пераходу гораду пад юрысдыкцыю КНР.
У чэрвені 2019 году дакумэнт выклікаў шматлікія пратэсты жыхароў Ганконгу. Крытыкі дакумэнту казалі, што ён мог быць выкарыстаны для перадачы ў рукі кітайскага правасудзьдзя дысыдэнтаў і несправядліва перасьледаваных людзей.
Дэманстрацыі выліліся ў масавы рух з патрабаваньнем дэмакратычных пераўтварэньняў. Адміністрацыя Ганконгу неаднаразова абвяшчала пра адмову ад законапраекту. Аднак пратэстоўцы пачалі патрабаваць афіцыйна адклікаць дакумэнт і працягнулі маршы пад лёзунгамі абароны сувэрэнітэту Ганконгу ад дамаганьняў Кітаю.
23 кастрычніка 2019 году ўлады Ганконгу афіцыйна адклікалі законапраект. Аднак гэта не спыніла пратэстаў.
