У Варшаве 1 лістапада прайшло першае пасяджэньне Кансультацыйнай рады, якая мае каардынаваць масавыя жаночыя пратэсты, што ахапілі краіну пасьля абвастрэньня правілаў выконваньня абортаў.
Кансультацыйная рада вырашыла правесьці блякаду дарог у Польшчы 2 лістапада.
Кансультацыйную раду, як паведамляе Gazeta Wyborcza, стварыла ініцыятыва «Агульнапольскі жаночы страйк» на ўзор беларускай апазыцыйнай Каардынацыйнай рады.
«Мы прыглядаемся да Беларусі і бачым, наколькі важныя рэгулярныя акцыі», — сказала адна зь лідэрак «Агульнапольскага жаночага страйку» Марта Лемпарт. — Мы хочам, каб блякады паўтараліся штотыдзень. Людзі выдатна самаарганізоўваюцца, ведаюць, дзе і як пратэставаць. Іх раздражняюць ня толькі аборты, але і пандэмія, і бездапаможнасьць дзяржавы ва ўмовах крызісу».
Паводле ацэнак «Жаночага страйку», пасьля рашэньня Канстытуцыйнага трыбуналу, якое абвастрыла закон аб абортах, акцыі пратэсту праводзіліся ў больш як у 500 гарадах Польшчы. Ацэньваецца, што ў мінулую пятніцу, 30 кастрычніка, на вуліцы ўсёй краіне выйшлі больш за 800 тысяч чалавек.
Канстытуцыйны суд Польшчы 22 кастрычніка прызнаў антыканстытуцыйнымі палажэньні аб спыненьні цяжарнасьці пры цяжкіх заганах плода.
